एजेन्सी – विश्व प्रसिद्ध टि२० फ्रेन्चाइज लिग इन्डियन प्रिमियर लिग (आइपिएल) मा अर्को सिजनबाट लखनउ र अहमदाबादको टोली थपिने भएको छ । सोमबार सम्पन्न ६ घण्टा लामो बोलकबोलपछि आरपी संजिव गोएंका समूह (आरपीएसजी) र सिभिसीले टोली खरिद गरेका हुन् ।

आरपीएसजीले ७ हजार ९० करोड भारतीय रुपैयाँमा लखनउ फ्रेन्चाइज खरिद गर्दा सिभिसीले अहमदाबाद खरिद गर्न ५ हजार ६ सय २५ करोड भारतीय रुपैयाँ खर्चेको हो । आरपीएसजीले तिरेको मूल्य आइपिएलले राखेको न्युनतम २ हजार करोडभन्दा २ सय ५० प्रतिशत बढी हो । २२ कम्पनिले फ्रेन्चाइज खरिद गर्न इच्छा देखाएपनि ९ कम्पनि अन्तिम बोलकबोलमा उपस्थित थिए ।

भारतीय क्रिकेट कन्ट्रोल बोर्ड (बिसिसिआइ) अध्यक्ष सौरभ गांगुलीले ठूलो मुल्यमा दुई फ्रेन्चाइज बिक्नु राम्रो संकेत रहेको बताए । उनले यसले क्रिकेट र आर्थिक दुवै पक्ष थप बलियो हुने बताए । उनले यस कदमसँगै घरेलु क्रिकेटरले विश्व क्रिकेटमा प्रभाव छाड्न पाउने बताए । अब आइपिएलमा अर्को सिजनबाट १० टोलीले प्रतिस्पर्धा गर्नेछन् ।

दुवै नयाँ फ्रेन्चाइजले १० वर्षको अवधिमा यो रकम तिर्नुपर्नेछ । आइपिएलले लखनउ र अहमदाबादसँगै कटक, धर्मशाला, गुवाहाटी र इन्डोरलाई विकल्पको रुपमा राखेको थियो । आरपीएसजीले लखनउ र इन्दोर आफ्नो रोजाइमा राख्दा सिभिसीको नजर लखनउमा पनि थियो । बोलकबोल प्रक्रियामा म्यानचेस्टर युनाइटेडमा स्वामित्व रहेको ल्यान्सर ग्रुप, अहमदाबादको अद्नानी समूह लगायत उपस्थित रहेका थिए ।

आरपीएसजीले यसअघि सन् २०१६ र १७ मा राइजिङ पुने सुपरजायन्टको स्वामित्व किनेको थियो । आरपीएस्जीले हाल इन्डियन सुपर लिग फुटबलमा एटलेटिको मोहुन बगानसँगै टेनिस र बक्सिङमा पनि टोली खरिद गरेको छ ।