एजेन्सी – आइसिसी टि२० विश्वकप २०२१ सुपर १२ समूह ए को खेलमा बंगलादेशले इंग्ल्यान्डविरुद्ध पहिला ब्याटिङ गर्ने भएको छ । शेख जायद स्टेडियम आबूधाबीमा बंगलादेशका कप्तान महमूदुल्लाह रियादले टस जितेर पहिला ब्याटिङ गर्ने भएको छ ।

बंगलादेशले आजको खेलमा टोलीमा एक परिवर्तन गरेको छ । तीव्र गतिका बलर मोहम्मद सैफुद्दिनचोटका कारण बाहिरिएपछि उनको स्थानमा शोरिफुल इस्लामलाई मौका दिएका छन् । इंग्ल्यान्डले भने टोलीमा परिवर्तन गरेको छैन ।

टि२० आई क्रिकेट इतिहासमै पहिलो पटक बंगलादेश र इंग्ल्यान्डबीच प्रतिस्पर्धा हुँदैछ । इंग्ल्यान्ड लगातार दोस्रो जितको सोचमा हुनेछ । इंग्ल्यान्डले पहिलो खेलमा वेस्टइन्डिजलाई ५५ रनमा अल आउट गर्दै ६ विकेटको जित निकालेको थियो । वेस्टइन्डिजसँगको जितले इंग्ल्यान्डको मनोबल उच्च छ ।

यता बंगलादेश सुपर १२ को पहिलो खेलमा श्रीलंकासँग ५ विकेटले पराजित भएको थियो । तीव्र गतिका बलर मुस्ताफिजुर रहमान र सकिब प्रमुख हतियार हुन् । टि२० विश्वकप मात्र नभएर टि२० आई इतिहासमै पहिलो पटक यी दुई टोलीले एक आपसमा प्रतिस्पर्धा गर्दैछन् । कागजी रुपमा बांगलादेश भन्दा इंग्ल्यान्ड धेरै बलियो टोली हो । तर बंगलादेश र युएईको वातावरण र मैदान उस्तै प्रकारको हुँदा त्यसको फाइदा उठाउँदै बंगलादेश जित निकाल्ने सोचमा छ ।

इंग्ल्यान्डको प्लेइङ ११ : ओईन मोर्गन (कप्तान), मोईन अली, जोनी बेयरस्टो, जस बटलर, क्रिस जोर्डन, लियाम लिभिङस्टोन, डेविड मलान, टाइमल मिल्स, आदिल राशिद, जेसन रोय र क्रिस वोक्स ।

बंगलादेशको प्लेइङ ११ : महमुदूल्लाह रियाद (कप्तान), सकिब अल हसन, मुश्फिकुर रहिम, लिटन दास, अफिफ हुसैन, मोहम्मद नईम शेख, नुरुल हसन (विकेटकिपर), मुस्ताफिजुर रहमान, माहेदी हसन, शोरिफुल इस्लाम र नासुम अहमद ।