एजेन्सी – आइसिसी टि२० विश्वकप २०२१ मा इंग्ल्यान्डले लगातार दोस्रो जित हात पारेको छ । समूह ए मा रहेको इंग्ल्यान्डले बंगलादेशलाई ८ विकेटले पराजित गर्दै सेमिफाइनल सम्भावना बलियो बनाएको छ ।

जितको लागि १ सय २५ रनको सामान्य विजयी लक्ष्य पछ्याएको इंग्ल्यान्डले १४.१ ओभरमा २ विकेटको क्षतिमा पूरा गर्यो । इंग्ल्यान्डको जितमा ओपनर जेसन रोयले ३८ बलमा ५ चौका र ३ छक्का सहित सर्वाधिक ६१ रनमा आउट भए ।

डेविड मलान २५ बलमा ३ चौका सहित २८ रनमा अविजित रहे । जोनी बेयरस्टो ८ रनमा अविजित रहे । जस बटलर १८ बलमा १ चौका र १ छक्का सहित १८ रनमा क्याच आउट भए । बंगलादेशका शोरिफुल ईस्लाम र नासुम अहमदले १–१ विकेट लिए ।

शेख जायद स्टेडियम आबूधाबीमा टस जितेर पहिला ब्याटिङ थालेको बंगलादेशले निर्धारित २० ओभरमा ९ विकेट गुमाउँदै १ सय २४ रन बनायो । बंगलादेशका मुश्फिकुर रहिमले ३० बलमा ३ चौका सहित सर्वाधिक २९ रन बनाए । कप्तान महमुदूल्लाह रियादले २४ बलमा १ चौका सहित १९ रन जोडे । नासुम अहमद ९ बलमा १ चौका र २ छक्का सहित १९ रनमा अविजित रहे ।

तेस्रो ओभरमा स्पिनर मोईन अलीले लगातार दुबै ओपनरलाई पेभेलिएन फर्काएका थिए । तेस्रो ओभरको दोस्रो बलमा ठूलो सट खेलेका लिटन दास डिप स्क्वायर लेगमा लियाम लिभिङस्टोनबाट ९ रनमा क्याच आउट भएका थिए । लगत्तै अर्को बलमा मोहम्मद नइम मिडअनमा ५ रनमा क्रिस वोक्सबाट क्याच भएका थिए । क्रिस वोक्सको छैटौं ओभरको दोस्रो बलमा फाइन लेगमा आदिल राशिदले उत्कृष्ट क्याच लिएपछि सकिब अल हसन ४ रनमा पेभेलिएन पर्केका थिए । त्यसपछि बंगलादेश खेलमा पुरै दबाबमा परेको थियो ।

अनुभवी ब्याटर रहिमलाई लियाम लिभिङस्टोनले ११ औं ओभरको चौथो बलमा एलबीडब्लू आउट गरे । १३ औं ओभको चौथो बलमा अफिफ हुसैन ५ रनमा रन आउट भए । लिभिङस्टोनले महमूदुल्लाह रियादलाई १९ रनमा एलबीडब्लू आउट गरे । नुरुल हसन १८ बलमा १६ रनमा आउट भए ।

इंग्ल्यान्डका तीव्र गतिका बलर टाइमल मिल्सले ४ ओभरमा २७ रन खर्चेर सर्वाधिक ३ विकेट लिए । पार्टटाइम स्पिनर लियाम लिभिङस्टोनले ३ ओभरमा १५ रन खर्चेर २ विकेट लिए । मोईन अलीले ३ ओभरमा १८ रन खर्चेर २ विकेट लिए । क्रिस वोक्सको नाममा १ विकेट रह्यो ।

इंग्ल्यान्डले पहिलो खेलमा वेस्टइन्डिजलाई ६ विकेटले पराजित गरेको थियो । उक्त खेलमा वेस्टइन्डिजलाई ५५ रनमा अल आउट गरेको थियो । इंग्ल्यान्ड २ खेलमा २ मानै जितका साथ शीर्ष स्थानमा छ । इंग्ल्यान्डले अव शनिबार अष्ट्रेलियासँग खेल्नेछ । समान २ अंक भएपनि नेटरनरेटको आधारमा श्रीलंका दोस्रो, अष्ट्रेलिया तेस्रो र दक्षिण अफ्रिका चौथो स्थानमा छन् । समान दुई खेल खेल्दा अंक बिहिन बनेका बंगलादेश पाँचौं र वेस्टइन्डिज पुछारमा छन् । बंगलादेशले शुक्रबार वेस्टइन्डिजसँग खेल्नेछ ।

सुपर १२ को समूह बी मा पाकिस्तान २ खेलमा २ मानै जितका साथ शीर्ष स्थानमा छ । अफगानिस्तान १ खेलमा १ मा जितका साथ दोस्रो स्थानमा छ । अन्य टोलीले खाता खोलेका छैनन् । कुनै खेल नखेलेको नामिबिया तेस्रो स्थानमा छ । समान एक खेल खेलेका न्युजिल्यान्ड चौथो, भारत पाँचौं र स्कटल्यान्ड पुछारमा छन् ।