काठमाडौं(हाम्रो खेलकुद) – आगमी नोभेम्बरमा मलेसियामा हुने आइसिसी वुमन्स टि२० विश्वकप एसिया छनोटको लागि नेपाल क्रिकेट संंघ (क्यान) ले नेपाली राष्ट्रिय महिला अन्तिम टोली घोषणा गरेको छ । क्यानले रुविना कप्तानीमा स्पिन अलराउन्डर कविता जोशीलाई पहिलो पटक समेट्दै अन्तिम १४ सदस्य टोली घोषणा गरेको छ ।

त्यस्तै टोलीमा विकेटकिपर ज्याति पाण्डे, स्पिनर संगिता राई र सबनम राईले टोलीमा पूनरागमन गरेका छन् । सुदूरपश्चिमकी कविताले पुषमा दाङमा भएको प्रधानमन्त्रीकप महिला टि२० क्रिकेट प्रतियोगितामा उच्च प्रदर्शन गरेकी थिइन् । कविता स्पिनसँगै तल्लोक्रममा ठूला सटको क्षमता राख्छिन् । पिएम कपमा कविताले ५० रन बनाउनुको साथै ६ विकेट लिएकी थिइन् । जसमा बागमती प्रदेशविरुद्ध २ ओभरमा १० रन खर्चेर ह्याट्रिक सहित ५ विकेट लिएकी थिइन् ।

नेपाल एपिएफ क्लबकी ज्याति पाण्डेले घरेलु क्रिकेटमा पछिल्लो समय लगातार राम्रो प्रदर्शन गर्दै आएकी छिन् । पिएमकपमा ज्योति ५ खेलमा १ सय ५१ रनका साथ सर्वाधिक रन बनाउने खेलाडी बनेकी थिइन् । पिएम कपको उपाधि प्रदेश नम्बर १ लाई जिताउन सबमन र संगिताले उत्कृष्ट प्रदर्शन गरेका थिए । पिएम कपमासंगिता राईले ११ र सबनमले ७ विकेट लिएकी थिइन् ।

सङ्गीता पिएम कपको सर्वोत्कृष्ट खेलाडी चुनिएकी थिइन् । ज्योति उत्कृष्ट ब्याटर घोषित भएकी थिइन् । संगिता, ज्योति र सबनम १३ औं सागमा नेपाली टोलीमा थिएनन् । सरस्वती घर्तीमगर, रोमा थापा, अस्मिना कर्माचार्य र ममता चौधरी वैकिल्प खेलाडीमा छन् ।

२०२३ मा दक्षिण अफ्रिकामा हुने टि२० विश्वकपको लागि नेपालले ग्लोबल छनोटको लागि मलेसियामा एसिया छनोट खेल्ने छ । नेपाली महिला टोलीले पछिल्लो पटक सन् २०१९ मा नेपालमा भएको १३ औं दक्षिण एसियाली खेलकुद (साग) प्रतिस्पर्धा गरेका थिए ।

आइसिसी वुमन्स टि२० विश्वकप एसिया छनोट आगमी नोभेम्बर २२ देखि २८ सम्म मलेसियामा हुने छ । प्रतियोगितामा नेपाल, भुटान, चीन, हङकङ, कुवेत, म्यानमार, मलेसिया र यूएई गरि आठ देशको सहभागीता हुने छ । सन् २०२३ मा दक्षिण अफ्रिकामा हुने टि२० विश्वकपको लागि नेपालले एसिया छनोट खेल्ने छ । एसिया छनोटको विजेता पाँच क्षेत्रबीच हुने ग्लोबल छनोटमा प्रतिस्पर्धा गर्ने छन् । ग्लोबल छनोटबाट शीर्ष दुई टोलीले दक्षिण अफ्रिकामा हुने टि२० विश्वकपको लागि स्थान बनाउने छन् । मलेसियामा हुने प्रतियोगितामा नेपाल उपाधिको प्रमुख दाबेदार टोली हो ।

नेपाली महिला टोली :

रुबिना क्षेत्री बेलबासे (कप्तान), सीता रानामगर, डली भट्ट, करुणा भण्डारी, इन्दु बर्मा, सरिता मगर, ज्याति पाण्डे, सरस्वती चौधरी, काजल श्रेष्ठ, सबनम राई, कविता कुँवर, अप्सरी बेगम, कविता जोशी र सङ्गीता राई ।