एजेन्सी – आइसिसी टि२० विश्वकप २०२१ मा सुपर १२ को आफ्नो पहिलो खेलमानै नामिबियाले स्कटल्यान्डलाई पराजित गरेको छ । सुपर १२ को समूह बी मा रहेको नामिबियाले स्कटल्यान्डलाई ४ विकेटले पराजित गर्दै २ अंक जोडेको छ ।

जितको लागि १ सय १० रनको सामान्य विजयी लक्ष्य पछ्याएको नामिबियाले १९.१ ओभरमा ६ विकेटको क्षतिमा पूरा गर्यो । नामिबिया जितमा जेजे स्मित २३ बलमा २ चौका र २ छक्का सहित ३२ रनमा अविजित रहे । ओपनर के्रग विलियम्स २९ बलमा २३ र माइकल भ्यान लिङ्गेन २४ बलमा १८ रनमा आउट भए ।

पूर्व दक्षिण अफ्रिकी क्रिकेटर डेविड विसे १६, किकेटकिपर जीन ग्रिन ९ र गेहरार्ड इरास्मस ४ रनमा आउट भए । स्टकल्यान्डका माइकल लिस्कले सर्वाधिक २ विकेट लिए । त्यसअघि शेख जायद स्टेडियम आबूधाबीमा टस हारेर पहिला ब्याटिङ थालेको स्कटल्यान्डले निर्धारित २० ओभरमा ८ विकेटको क्षतिमा १ सय ९ रन बनाएको थियो । स्कटल्यान्डका माइकल लिस्कले २७ बलमा ४ चौका र २ छक्का सहित सर्वाधिक ४४ रनको योगदान दिए ।

क्रिस ग्रीभ्स २५ र म्याथ्यु क्रस १९ रनमा आउट भए । अन्य कुनैपनि ब्याटरले दोहोरो अंकमा रन बनाउन सकेनन् । पहिलो ओभरमै स्कटल्यान्डले आफ्ना प्रमुख तीन ब्याटर जर्ज मुन्से, कलुम म्याकलड र कप्तान रिची बेरिंगटन शून्यमा गुमाएको थियो । तीव्र गतिका बलर रुबेन ट्रम्पलम्यानले पहिलो ओभरमै प्रमुख तीन विकेट लिएपछि नामिबियाले खेलमा निरन्तर पकड जमाउँदै स्कटल्यान्डलाई सस्तैमा समेटेको थियो ।
नामिबिया रुबेन ट्रम्पलम्यानले ४ ओभरमा १७ रन खर्चेर सर्वाधिक ३ विकेट लिए । जन फिंलिकले २, जेजे स्मित र डेविड विसेले १–१ विकेट लिए ।

नामिबिया सुपर १२ को समूह बी मा २ अंकका साथ तेस्रो स्थानमा छ । नामिबियाले अव आइतबार अफगानिस्तानसँग खेल्नेछ । २ खेलमा अंक बिहीन हुँदै पुछारमा रहेको स्कटल्यान्डले तेस्रो खेल बुधबार न्युजिल्यान्डसँग खेल्नेछ । नामिबियाले पहिलो पटक टि२० विश्वकप खेलेको हो । पहिलो चरणको समूह ए बाट आयरल्यान्डलाई पछि पार्दै दोस्रो स्थानमा रहेर सुपर १२ मा स्थान बनाएको थियो ।

सुपर १२ को समूह ए मा इंग्ल्यान्ड २ खेलमा २ मानै जितका साथ शीर्ष स्थानमा छ । समान २ अंक भएपनि नेटरनरेटको आधारमा श्रीलंका दोस्रो, अष्ट्रेलिया तेस्रो र दक्षिण अफ्रिका चौथो स्थानमा छन् । समान दुई खेल खेल्दा अंक बिहिन बनेका बंगलादेश पाँचौं र वेस्टइन्डिज पुछारमा छन् ।

सुपर १२ को समूह बी मा पाकिस्तान २ खेलमा २ मानै जितका साथ शीर्ष स्थानमा छ । अफगानिस्तान १ खेलमा १ मा जितका साथ दोस्रो स्थानमा छ । अंक समान एक खेल खेलेका न्युजिल्यान्ड चौथो र भारत पाँचौं स्थानमा छन् ।