एजेन्सी – आइसिसी टि२० विश्वकप सुपर १२ अन्तर्गत आज समूह ए को एक मात्र खेलमा अष्ट्रेलिया र श्रीलंकाबीच प्रतिस्पर्धा हुँदैछ । खेल नेपाली समय अनुसार दुबई इन्टरनेशल क्रिकेट स्टेडियममा बेलुका ७ : ४५ मा सुरु हुनेछ ।

सुपर १२ मा दुबै टोली लगातार दोस्रो जितको सोचमा छन् । श्रीलंका समूह ए को विजेता रुपमा सुपर १२ मा स्थान बनाएको हो । श्रीलंका पहिलो चरणमा तीन खेलमा तीनमानै जितका साथ समूह विजेता बनेको थियो । सुपर १२ को पहिलो खेलमा बंगलादेशलाई ५ विकेटले पराजित गरेको थियो । अष्ट्रेलियाले पहिलो खेलमा दक्षिण अफ्रिकालाई ५ विकेटलेनै पराजित गरेको थियो ।

अष्ट्रेलियालाई शीर्षक्रमको ब्याटिङ चिन्ताको विषय बन्दै आएको छ । पहिलो खेलमा दक्षिण अफ्रिकाले प्रस्तुत गरेको १ सय १९ रनको विजयी लक्ष्य पछ्याउन अष्ट्रेलियाले १९.४ ओभरमा ५ विकेट गुमाएको थियो । ओपनर डेविड वार्नर १४, आरोन फिन्च शून्य र मिचेल मार्श ११ रनमा आउट भएका थिए । फिन्च र वार्नरको खराब लय अष्ट्रेलियालाई सबैभन्दा ठूलो चिन्ताको विषय हो । वार्नर पछिल्लो खेलमा लयमा फर्किने संकेत दिएका थिए ।

मार्शले भने पछिल्लो समय उत्कृष्ट प्रदर्शन गर्दै आएका छन् । आजको खेलमा उनीबाट उच्च प्रर्दशनको अपेक्षा गरिएको छ । स्टिभ स्मिथ र ग्लेन म्याक्सवेल अष्ट्रेलिया प्रमुख ब्याटर हुन् । अष्ट्रेलिया म्याक्सवेलबाट उनको शैलीको आक्रामक ब्याटिङ चाहन्छ । तल्लोक्रमका मार्कस स्टोइनिस र म्याथ्यु वेडबाट उत्कृष्ट अन्त्य चाहन्छ । आक्रामक ब्याटिङका लागि चर्चित स्टोइनिस राम्रो लयमा छन् । दक्षिण अफ्रिकालाई हराउन स्टोइनिसले २४ रनको अविजित इनिङ खेलेका थिए ।

अष्ट्रेलियाको तीव्र गतिको बलिङ युनिट उत्कृष्ट छ । मिचेल स्टार्क, जोश हेजलवुड र प्याट कमिन्स प्रमुख तीव्र गतिका बलर हुन् । यी तीनै बलर उत्कृष्ट प्रदर्शनको लागि चिनिन्छन् । स्पिनरमा एडम जाम्पा रहनेछन् । ग्लेन म्याक्सवेल र स्टोइनिस पार्टटाइ बलर हुन् । पहिलो खेलमा अष्ट्रेलिया बलरले उच्च प्रदर्शन गरेको हुँदा टोलीमा परिवर्तन गर्ने सम्भावना कम छ ।

यता श्रीलंका अष्ट्रेलियालाई स्तब्ध पार्ने सोचमा छ । श्रीलंकाले विश्वकपमा सानदार प्रदर्शन गर्दै आएको छ । पहिलो चरणमा नामिबियालाई ७ विकेट, आयरल्यान्डलाई ७० रन र नेदरल्यान्ड्सलाई ८ विकेटले पराजित गरेको थियो । बंगलादेशलाई हराउन चरिथ असलंकाले ८० र भानुका राजपक्षेले ५३ रनको उत्कृष्ट इनिङ खेलेका थिए । पछिल्लो समय यी दुई ब्याटरले श्रीलंकाबाट उत्कृष्ट प्रदर्शन गर्दै आएका छन् । यी दुई ब्याटरको लय रोक्न अष्ट्रेलियालाई चुनौती हुनसक्छ ।

ओपनर कुशल परेराको खराब लय श्रीलंकालाई चिन्ता थपेको छ । उनी बंगलादेशसँग १, आयरल्यान्डसँग शून्य र नामिबियासँग ११ रनमा आउट भएका थिए । प्रमुख तथा अनुभवी ब्याटर कुशलबाट श्रीलंका उत्कृष्ट प्रदर्शन चाहन्छ । उनलाई जिम्मेवारीका साथ ब्याटिङ गर्न आवश्यक पनि देखिन्छ । अर्का ओपनर पाथुम निसंका भने राम्रो लयमा छन् । अविष्क फर्नान्डो र वानिन्दु हसरंगा मध्यक्रम सम्हाल्ने छन् । युवा ब्याटर अविष्का श्रीलंकालाई आजको खेलमा नायक बन्न सक्छन् ।

स्पिनर वानिन्दु हसरंगा र तीव्र गतिका बलर दुश्मन्था चामिरा श्रीलंका प्रमुख बलिङ हतियार हुन् । वानिन्दुले पछिल्लो समय उत्कृष्ट प्रदर्शनका साथ श्रीलंका जित सहज बनाउँदै आएका छन् । चामिराले नयाँ बलका साथ निरन्तर विकेट लिँदै आएका छन् । श्रीलंकाले बिनुरा फर्नान्डोको स्थानमा स्पिनर महेश थेक्सनालाई मौका दिन सक्छ ।

हेड टु हेड :

यी दुई देशबीच कुल १६ टि२० आई खेल भएका छन् । जसमा दुबै टोलीले ८–८ मा जित निकालेका छन् । पछिल्ला चार खेलमा अष्ट्रेलियाले लगातार जित निकालेको छ । श्रीलंकाले २०१७ मा अष्ट्रेलियालाई अन्तिम पटक २ विकेटले पराजित गरेको थियो । चार वर्षको अन्तरमा श्रीलंका टोलीको स्तरमा धेरै परिवर्त आएको छ । अहिले पहिला भन्दा बढी खस्केको छ ।

टि२० विश्वकपमा यी दुई देशबीच कुल ३ खेल भएका छन् । जसमा अष्ट्रेलिया २ खेलमा जित र १ खेलमा पराजित भएको छ । पछिल्लो पटक २०१० को विश्वकपमा प्रतिस्पर्धा गरेका थिए । उक्त विश्वकपमा अष्ट्रेलिया ८१ रनले विजयी भएको थियो । २००९ मा श्रीलंकाले ६ विकेटले हराएको थियो । २००७ मा अष्ट्रेलियाले १० विकेटले श्रीलंकालाई पराजित गरेको थियो ।

श्रीलंका टोली :

दासुन शनका (कप्तान), धनन्जय डि सिल्भा, कुसल पेरेरा, दीनेश चान्डिमल, अविष्का फनान्डो, भानुका राजपक्षे, चरिथ असालका, वानिन्दु हसरंगा, बिनुरा फर्नान्डो, चामिका करुणारत्ने, लाहिरु कुमारा, दुश्मन्था चामिरा, पाथुम निसंका, अकिला धनन्जय र महेश थेक्शेना ।

अष्ट्रेलिया टोली : 

आरोन फिन्च (कप्तान), एश्टन अगर, प्याट कमिन्स (उपकप्तान), जोश हेजलवुड, जोश इंग्लिस, मिचेल मार्श, ग्लेन म्याक्सवेल, केन रिचर्ड्सन, स्टिभ स्मिथ, मिचेल स्टार्क, मार्कस स्टोइनिस, मिचेल स्विपसन, म्याथ्यु वेड, डेविड वार्नर र एडम जाम्पा