एजेन्सी – ओपनर डेविड वार्नरको अर्धशतकको सहयोगमा अष्ट्रेलियाले आइसिसी टि२० विश्वकप २०२१ मा लगातार दोस्रो जित हात पारेको छ । बिहीबार अष्ट्रेलियाले श्रीलंकालाई ७ विकेटले हराउँदै लगातार दोस्रो जित हात पारेको हो ।

जितको लागि १ सय ५५ रनको विजयी लक्ष्य पछ्याएको अष्ट्रेलियाले १७ ओभरमा ३ विकेटको क्षतिमा पूरा गर्यो । अष्ट्रेलियाको जितमा ओपनर डेविड वार्नरले ४२ बलमा १० चौका सहित सर्वाधिक ६५ रनको योगदान दिए । पछिल्लो समय खराब प्रदर्शनका साथ चर्को आलोचना खेप्दै आएका वार्नरले उत्कृष्ट प्रदर्शनका साथ आफ्नो लयमा फर्किएको संकेत दिएका छन् ।

अष्ट्रेलियालाई ओपनर डेविड वार्नर र आरोन फिन्चले ६.५ ओभरमा ७० रनको साझेदारी गर्दै उत्कृष्ट सुरुवात दिलाएका थिए । फिन्चलाई स्पिनर वानिन्दु हसरंगाले ३७ रनमा एलबीडब्लू आउट गर्दै पहिलो सफलता दिलाएका थिए । फिन्चले २३ बलमा ५ चौका र २ छक्का प्रहार गरे ।

स्टिभ स्मिथ २६ बलमा १ चौका सहित २८ रनमा अविजित रहे । मार्कस स्टोइनिस ७ बलमा २ चौका र १ छक्का सहित १६ रनमा अविजित रहे । ग्लेन म्याक्सवेल ५ रनमा आउट भएका थिए । श्रीलंकाका स्पिनर वानिन्दु हसरंगाले २ र दासुन शनकाले १ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङको निम्तो पाएको श्रीलंकाले निर्धारित २० ओभरमा ६ विकेट गुमाउँदै १ सय ५४ रन बनायो । श्रीलंका चरिथ असालंका र कुशल परेराले सर्वाधिक ३५–३५ रन बनाए । कुशलले २५ बलमा ४ चौका र १ छक्का प्रहार गरे । चरिथले २७ बलमा ४ चौका र १ छक्का प्रहार गरे । भानुका राजपक्षे २६ बलमा ४ चौका र १ छक्का सहित ३३ रनमा अविजित रहे ।

तीव्र गतिका बलर प्याट कमिन्सले तेस्रो ओभरको तेस्रो बलमा ओपनर पाथुम निसंकालाई ७ रनमा डेविड वार्नरबाट क्याच गराउँदै पहिलो सफलता दिलाएका थिए । तर दोस्रो विकेटका लागि चरिथ असालंका र कुशल परेराले ६३ रनको साझेदारी गरेपछि श्रीलंका सम्हाल्लिदै राम्रो योगफलको सम्भावना देखाएका थिए ।

स्पिनर एडम जाम्पाले दशौं ओभरको चौथो बलमा असालंकालाई स्टिभ स्मिथबाट क्याच गराएपछि अष्ट्रेलियाले खेलमा पूनरागमन गरेको थियो । लगत्तै अर्को ओभरमा स्टार्कले कुशललाई बोल्ड आउट गरे । १२ औं ओभरको पाँचौं बलमा जाम्पाले अविष्का फर्नान्डोलाई ४ रनमा स्मिथबाट क्याच आउट गराए ।

१३ औं ओभरको दोस्रो बलमा वानिन्दु हसरंगालाई ४ रनमा क्याच आउट गराएपछि श्रीलंका ९४–५ को कमजोर अवस्थामा पुगेको थियो । तल्लोक्रमका कप्तान दासुन शनकाले १२ र चामिका करुणारत्नेले ९ रन बनाए । स्पिनर एडम जाम्पाले ४ ओभरमा १२ रन खर्चेर २ विकेट लिए । तीव्र गतिका बलर प्याट कमिन्सले ४ ओभरमा ३४ रन खर्चेर २ विकेट लिए । मिचेल स्टार्कले ४ ओभरमा २७ रन खर्चेर २ विकेट लिए ।

सुपर १२ को समूह ए मा इंग्ल्यान्ड २ खेलमा २ मानै जितका साथ ४ अंक जोड्दै शीर्षस्थानमा छ । अष्ट्रेलिया २ खेलमा समान नतिजाका साथ ४ अंक भएपनि नेट रनरेटका आधारमा दोस्रो स्थानमा छ । अष्ट्रेलियाले पहिलो खेलमा दक्षिण अफ्रिकालाई ५ विकेटले हराएको थियो । अव अष्ट्रेलियाले शनिबार इंग्ल्यान्डसँग खेल्नेछ ।

२ खेलमा १ मा जित र १ मा हार सहित दक्षिण अफ्रिका तेस्रो स्थानमा छ । श्रीलंका २ खेलमा १ मा जित र १ मा हार सहित चौथो स्थानमा छ । बंगलादेश २ खेलमा अंक बिहीन हुँदै पाँचौं र समान खेल र नतिजाको साथ वेस्टइन्डिज पुछारमा छन् ।

सुपर १२ को समूह बी मा पाकिस्तान २ खेलमा २ मानै जितका साथ शीर्ष स्थानमा छ । अफगानिस्तान १ खेलमा १ मा जितका साथ दोस्रो स्थानमा छ । नामिबिया १ खेलमा २ अंकका साथ तेस्रो स्थानमा छ । अंक बिहीन न्युजिल्यान्ड चौथो, भारत पाँचौं र स्कटल्यान्ड पुछारमा छन् ।