भुपेन्द्र जिसी, काठमाडौं

आइसिसी टि२० विश्वकप २०२१ सुपर १२ मा अफगानिस्तानलाई ५ विकेटले हराउँदा पाकिस्तानका आसिफ अलीले फिनिसिङको उत्कृष्ट नमुना पेस गरे । पाकिस्तानको पछिल्ला दुवै जितमा निर्णायक भुमिकामा आसिफ नै रहे । तर यिनै आसिफ नेपालमा एभरेष्ट प्रिमियर लिगमा भने फ्लप रहेका थिए ।

ग्रुप २ को मा रहेको पाकिस्तानले लगतार तेस्रो खेलमा जित निकाल्नेक्रममा शुक्रबार राती अफगानिस्तानलाई पराजित गर्दै सेमिफाइनल यात्रा बलियो बनाएको छ । शुक्रबार राती पाकिस्तानले जितको लागि १ सय ४८ रनको विजयी लक्ष्य पछ्याउने क्रममा जितको लागि अन्तिम १२ बलमा २४ रन आवश्यक परेको थियो । आसिफले १९ औं ओभरमा तीव्र गतिका बलर करिम जन्नतलाई ४ छक्का प्रहार गर्दै पाकिस्तानलाई अफगानिस्तानसँग अप्रत्याशित हारबाट जोगाएका थिए ।

तीव्र गतिका बलर करिज जन्नतलाई १९ औं ओभरको पहिलो बलमै आसिफले लङअफमा सानदार छक्का प्रहार गरेका थिए । दोस्रो बलमा रन जोड्न सकेनन् । तेस्रो बलमा मिडविकेटमा सानदार छक्का प्रहार गरेपछि पाकिस्तान जिततर्फ अघि बढेको थियो । चौथो बल जन्नतले डट राखे । पाँचौं बलमा जन्नतले योर्कर फ्याँलेपनि लङअफमा आसिफले सानदार छक्का प्रहार गर्दै जित सहज बनाएका थिए । अन्तिम बलमा छक्का प्रहार गर्दै खेल एक अगावै जिताएका हुन् ।

अघिल्लो महिना सम्पन्न चौथो संस्करणको एभरेष्ट प्रिमियर लिग (इपिएल) मा चितवन टाइगर्सलाई उपाधि दिलाउन अफगानिस्तानका अलराउन्डर करिम जन्नतले उच्च प्रदर्शन गरेका थिए । आसिफले पनि इपिएल खेलिसकेका छन् । तर प्रदर्शन भने सम्झनलायक छैन ।

अफगानिस्तानविरुद्ध आसिफ ७ बलमा ४ छक्का सहित २५ रनमा अविजित रहे । यसअघि दोस्रो खेलमा पाकिस्तानले न्युजिल्यान्डलाई ५ विकेटले पराजित गर्न आसिफले अन्तिममा उत्कृष्ट फिनिसिङ गरेका थिए । पाकिस्तानले १ सय ३५ रनको विजयी लक्ष्य पछ्याउनेक्रममा १८.४ ओभरमा ५ विकेटको क्षतिमा पूरा गरेको थियो । आसिफले उत्कृष्ट अन्त्य गर्दै १२ बलमा १ चौका र ३ छक्का सहित २७ रनमा अविजित थिए ।

न्युजिल्यान्डविरुद्ध पाकिस्तानलाई जितको लागि अन्तिम २४ बलमा ३७ रन चाहिएको थियो । १७ औं ओभरको दोस्रो र तेस्रो बलमा टिम साउथीलाई छक्का प्रहार गर्दै पाकिस्तानको जित दिलाएका थिए । आसिफले १९ औं ओभरको तेस्रो बलमा ट्रेन्ट बोल्टलाई छक्का र चौथो बलमा दुई रनका साथ खेल फिनिसिङ गरेका थिए ।

पहिलो खेलमा भने पाकिस्तानले भारतलाई १० विकेटले हराएपछि उनले ब्याटिङ गर्नु परेन । टि२० विश्वकपमा पाकिस्तानका नायक आसिफ २०१७ मा इपिएल खेल्न नेपाल आएका थिए । पोखरा राइनोजबाट दोस्रो संस्करणको इपिएल खेलेका उनको प्रदर्शन भने सम्झनलायक थिएन ।

इपिएलमा आसिफको त्यो खराब प्रदर्शन

आसिफले २०१७ मा शक्ति गौचनको कप्तानीमा पोखराबाट इपिएल खेल्दै खराब प्रदर्शन गरेका थिए । पोखरा इलिमिनेटरबाट बाहिरिँदा आसिफले कुनैपनि खेलमा राम्रो प्रदर्शन गर्न सकेनन् । टियुको पिच र नेपाली बलर सामू उनी निरीह जस्तै बनेका थिए । उनले कुल ६ खेलमा २२ बल खेल्दा मात्र १८ रन बनाउन सकेका थिए । जसमा उत्कृष्ट प्रदर्शन १० रन थियो । प्रतियोगिता अवधिभर २ चौका मात्र प्रहार गरेका थिए ।

चितवन टाइगर्सविरुद्ध आसिफले ब्याटिङको अवसर पाएका थिएनन् । विराटनगर वारियर्सविरुद्ध आसिफलाई स्पिनर वसन्त रेग्मीले १ रनमा बोल्ड गरेका थिए । भैरहवा ग्ल्याडियटर्सविरुद्ध आसिफलाई तीव्र गतिका बलर कृष्ण कार्कीले पुनित मिश्राबाट १० रनमा क्याच गराएका थिए । ललितपुर प्याट्रियट्ससँगको खेलमा आसिफले ६ बलमा २ रन बनाएका थिए । स्पिनर ललितनारायण राजवंशीले जयकिशन कोल्सावालाबाट स्टम्पिङ आउट गराएका थिए ।

काठमाडौं किंग्स इलेभेनसँगको खेलमा आसिफ ३ बलमा ३ रन जोड्दा विक्रम भुषालबाट रन आउट भएका थिए । ललितपुरसँग एलिमिनेटर खेलमा पवन सरार्फले आसिफ अलीलाई २ रनमा बोल्ड गरेका थिए । आसिफ इपिएलमा फ्लप थिए । उनको प्रदर्शन सम्झन लायक थिएन ।

त्यसबेला टोलीका कप्तान शक्ति गौचनले आसिफको ब्याटबाट रन निस्केपनि उनको स्तरमा शंका गर्न नमिल्ने बताएका थिए । इपिएलमा नचलेपनि टिमा भने उनले आफ्नो क्षमता देखाएको शक्तिको भनाइ थियो ।

टि२० विश्वकपमा पाकिस्तान र अफगानिस्तानबिचको खेलमा इपिएल खेलेका चार खेलाडी थिए । अफगानिस्तानका करिम जन्नत र मोहम्मद शाहजाद यस सिजनको इपिएल उपाधि चितवनलाई च्याम्पियन बनाउन उच्च प्रदर्शन गरेका थिए । अफगानिस्तानका रहमानउल्लाह गुर्बाजले काठमाडौंबाट इपिएल खेलेका थिए ।

आसिफले इपिएलपछि पाकिस्तानको टोलीमा डेब्यू गरेका थिए । २०१८ को पाकिस्तान कपमा पन्जाबाट उत्कृष्ट प्रदर्शन गर्दै ४ खेलमा ३ सय २८ रन बनाएका छन् । त्यसपछि मार्चमा वेस्टइन्डिजसँगको सिरिजको लागि उनी पाकिस्तानको टोलीमा परेका थिए । वेस्टइन्डिजसँगको खेलमा टि२० आईमा डेब्यू गर्दै १ रनमा आउट हुन पुगेका थिए । जुलाईमा जिम्बावेविरुद्ध ओडिआईमा डेब्यू गर्दै २५ बलमा ४ चौका र २ छक्का सहित ४६ रनको इनिङ खेलेका थिए ।

विश्वकप २०१९ को त्यो पिडादायी घटना

आसिफ २०१९ को पाकिस्तानको एकदिवसिय विश्वकप टोलीमा परेका थिए । अली विश्वकप टोलीमा पर्नुअघि छोरीको क्यानसरको कारण मृत्यु भएको थियो । छोरीको मृत्युको बाबजुद पनि उनी देशको लागि विश्वकप खेल्न इंग्ल्यान्ड पुगेका थिए । विश्वकपमा आसिफले २ खेलमा १९ रन बनाएका थिए ।

विश्वकप टोलीमा परेपछि विवादित आसिफ

पाकिस्तानले टि२० विश्वकप २०२१ मा आफ्नो अन्तिम टोली घोषणा गर्दा देशमा चर्को आलोचना भएको थियो । केहि प्रत्याशित नाम थिए । आलोचित नाम मध्यका एक आसिफ पनि थिए । पछिल्लो समय पाकिस्तानको टोलीबाट उनको प्रदर्शन राम्रो थिएन ।

कतिपयले उनलाई पाकिस्तान क्रिकेट बोर्डका अध्यक्ष रमिज राजाको आदेशमा परेको सम्म आरोप लगाएका थिए । उनलाई उत्कृष्ट प्रदर्शनको दबाब र ईख पनि छ । विश्वकप टोलीमा पर्नुअघि आसिफले अप्रिलमा पाकिस्तानको टोलीबाट खेलेका थिए ।

विश्वकप अघि उनको प्रदर्शन भने राम्रो थिएन । विश्वकप टोलीमा पर्नुअघि पछिल्लो १० टि२० आई खेलमा उनको प्रदर्शन क्रमशः २५, ३, ६, २९, १, ११, ४, ७, ५ र १ थियो । त्यसैले पनि आसिफलाई विश्वकपमा पर्ने कम आशा थियो । । पाकिस्तानको ब्याटिङ बाबर आजम र मोहम्मद रिजवानमा बढी निर्भर छ । पाकिस्तानले तल्लोक्रम र मध्यक्रममा थुप्रै खेलाडीलाई प्रयोग गरेको थियो । तर खोजे जस्तो पाउन सकेन । पाकिस्तानले फिनिसरमा आसिफका साथनै जाने निर्णय लिएको थियो ।

विश्वकपका पाकिस्तानलाई आशा जगाउँदै आसिफ

सुरुवाती दुई खेलमा आसिफले आफ्नो भूमिकामा कुनै कसर राखेका छैनन् । आफ्ना आलोचकलाई राम्रो जवाफ दिएका छन् । आसिफले मौका पाएका दुवै खेलमा उत्कृष्ट फिनिसरको भूमिका निर्वाह गरेका छन् । अव पाकिस्तानको सेमिफाइनल सम्भावना निश्चित जस्तै भएको छ । सेमिफाइनल औपचारिकता बाँकी देखिन्छ । दोस्रो घरेलु मैदान युएईको भरपूर्ण फाइदा उठाएको पाकिस्तान टि२० विश्वकप जित्ने सोचमा छ ।

आसिफको यस प्रदर्शनले पाकिस्तान अझ उत्साहित र खुसी बनेको छ । अर्कोतर्फ सुरुवाती दुई खेलले उच्च प्रदर्शनले उनको मनोबल पनि उच्च छ । यसले पाकिस्तानलाईनै फाइदा पुग्नेछ । अनि उनलाई उत्कृष्ट प्रदर्शन बाहेकको विकल्प पनि छैन । आसिफले सिमित ब्याटरमा निर्भर छैन भन्ने सन्देश पनि दिएका छन् ।

यो पनि पढ्नुहोस् : विश्वकप टोलीमा पर्नुअघि छोरीको निधन