काठमाडौं (हाम्रो खेलकुद) – नेपाली राष्ट्रिय महिला क्रिकेट टोलीले पहिलो पटक टि२० आई सिरिज खेल्ने भएको छ । अर्को महिना संयुक्त अरव इमिरेट्स (युएई) मा हुने आइसिसी वुमन्स टि२० विश्वकप एसिया छनोटको तयारीको लागि नेपाली महिला टोलीले कतारसँग तीन टि२० आई सिरिज खेल्ने छ । नेपाली महिला टोलीले कतारसँग तीन टि२० आई सिरिज खेल्ने नेपाल क्रिकेट संघ (क्यान) ले जनाएको छ ।

यसअघि यस प्रतियोगिता मलेसियामा हुने भनिएपनि युएईमा हुने नेपाल क्रिकेट संघ क्यानका कार्यवाहक सचिव प्रशान्त विक्रम मल्लले हाम्रो खेलकुदलाई जानकारी दिए । नेपाली महिला टोली कार्तिक २८ गते (१४ नोभेम्बर) मा कतारतर्फ प्रस्थान गर्नेछ । प्रशान्तका अनुसार महिला टोलीले कार्तिक ३०, मंसिर १ र २ गते (नोभेम्बर १६, १७ र १८) मा कतारसँग तीन टि२० आई सिरिज खेल्नेछ । त्यसपछि नेपाली टोली मंसिर ३ मा युएईतर्फ लाग्ने छ । एसिया छनोट मंसिर ६ देखि १२ सम्म (नोभेम्बर २२ देखि २८) सम्म हुनेछ ।

नेपाली महिला टोलीले पहिलो पटक टि२० आई खेल सन् २०१८ मा थाईल्यान्ड वुमन्स साम्समा चीनविरुद्ध खेलेको थियो । उक्त प्रतियोगितामा नेपाल सहित, थाईल्यान्ड, भुटान, इन्डोनिसिया, युएई, चीन, मलेसिया, हङकङ र म्यानमारको सहभागीता थियो । नेपाल फाइनलमा थाईल्यान्डसँग ७० रनले पराजित भएको थियो ।

फेब्रुअरीमा थाईल्यान्डमा भएको आइसिसी वुमन्स टि२० विश्वकप एसिया रिजन छनोटमा थाईल्यान्डसँग ५७ रनले पराजित हुँदै विश्वकप छनोट खेल्नबाट बन्चित बनेको थियो । थाईल्यान्डले ग्लोबल छनोटमा उत्कृष्ट प्रदर्शनका साथ विश्वकपमा स्थान बनाउँदै दमदार प्रदर्शन गरेको थियो । अन्तिम पटक नेपालले २०१९ डिसेम्बरमा १३ औं दक्षिण एसियाली खेलकुद (साग) मा पोखरामा खेलेको थियो ।

२०२३ मा दक्षिण अफ्रिकामा हुने टि२० विश्वकपको लागि नेपालले २०२२ मा हुने ग्लोबल छनोटमा स्थान बनाउन एसिया छनोट खेल्ने छ । प्रतियोगितामा नेपाल, भुटान, चीन, हङकङ, कुवेत, म्यानमार, मलेसिया र यूएई गरि आठ देशको सहभागीता हुनेछ । विजेता टोलीले २०२२ हुने ग्लोबल छनोटमा स्थान बनाउने छन् । हरेक क्षेत्रबाट १–१ विजेता टोली गरि पाँच टोलीले ग्लोबल छनोटमा स्थान बनाउने छन् । नेपालले एसिया छनोट खेल्ने अन्तिम नेपाली टोली पनि घोषणा गरि सकेको छ ।

नेपाली महिला टोली :

रुबिना क्षेत्री बेलबासे (कप्तान), सीता रानामगर, डली भट्ट, करुणा भण्डारी, इन्दु बर्मा, सरिता मगर, ज्याति पाण्डे, सरस्वती चौधरी, काजल श्रेष्ठ, सबनम राई, कविता कुँवर, अप्सरी बेगम, कविता जोशी र सङ्गीता राई ।