एजेन्सी – अफगानिस्तानका स्पिनर राशिद खानले टि२० आई क्रिकेटमा नयाँ कीर्तिमान बनाएका छन् । आइसिसी टि२० विश्वकप २०२१ सुपर १२ को समूह २ मा शुक्रबार राती पाकिस्तानसँगको खेलमा राशिदले टि२० आई खेलमा सर्वाधिक छिटो १ सय विकेट लिने बलरको कीर्तिमान बनाएका छन् ।

राशिदले मात्र ५३ इनिङमा टि२० आईमा १ सय विकेट पूरा गरेका छन् । राशिदले श्रीलंका पूर्व तीव्र गतिका बलर लासिथ मलिङ्गाको ७६ खेलको कीर्तिमान तोडेका छन् । १५ औं ओभरको पहिलो बलमा मोहम्मद हफिजलाई गुलबदीन नईबबाट १० रनमा क्याच गराउँदै राशिदले यस सफलता हात पारेका थिए । राशिद टि२० आईमा एक सय विकेट लिने चौथो खेलाडी हुन् । मलिङ्गा, राशिद, बंगलादेशका स्पिनर सकिब अल हसन र न्युजिल्यान्डका तीव्र गतिका बलर टिम साउथीले टि२० आईमा १ सय विकेट लिएका छन् ।

टि२० आईमा सकिब अल हसन ९४ खेलमा १ सय १७ विकेटका साथ शीर्ष स्थानमा छन् । टि२० आईमा एक सय विकेट लिने पहिलो बलर मलिङ्गा दोस्रो स्थानमा छन् । मलिङ्गाले ८४ खेलमा १ सय ७ विकेट लिएका छन् । राशिदले १ सय १ र टिम साउथीले ८४ खेलमा १ सय विकेट लिएका छन् ।

अफगानिस्तानका राशिद खान ओडिआई क्रिकेटमा पनि सर्वाधिक छिटो १ सय विकेट लिने बलर हुन् । राशिदले ओडिआईमा ४४ खेलमा १ सय विकेट पूरा गरेका थिए । पाकिस्तानले अफगानिस्तानलाई ५ विकेटले पराजित गरेको थियो । जितको लागि १ सय ४८ रनको विजयी लक्ष्य पछ्याएको पाकिस्तानले १९ ओभरमा ५ विकेटको क्षतिमा पूरा गरेको थियो । बाबर आजमको ५१ र आसिफ अलीको २५ रनको अविजित इनिङ खेलेका थिए । आसिफले १९ औं ओभरमा करिम जन्नतलाई चार छक्का प्रहार गर्दै जित दिलाएका थिए । राशिदले ४ ओभरमा २६ रन खर्चेर २ विकेट लिएका थिए ।

त्यसअघि दुबई इन्टरनेशल क्रिकेट स्टेडियममा टस जितेर पहिला ब्याटिङ रोजेको अफगानिस्तानले निर्धारित २० ओभरमा ६ विकेट गुमाउँदै १ सय ४७ रन बनाएको थियो । मोहम्मद नाबी र गुलबदीन नईब ३५–३५ रनमा अविजित थिए । अफगानिस्तान सुपर १२ को समूह २ मा २ खेलमा १ मा जित र १ मा हार सहित दोस्रो स्थानमा छ । अफगानिस्तानले अव आइतबार नामिबियासँग खेल्नेछ ।