एजेन्सी – ओपनर पाथुम निसांकाको अर्धशतकमा श्रीलंकाले आइसिसी टि२० विश्वकप २०२१ सुपर १२ को खेलमा दक्षिण अफ्रिकालाई १ सय ४३ रनको लक्ष्य दिएको छ । शारजाह क्रिकेट स्टेडियममा टस हारेर पहिला ब्याटिङ थालेको श्रीलंका २० ओभरमा १ सय ४२ रनमा अल आउट भयो ।

श्रीलंकाका पाथुम निसांकाले ५८ बलमा ६ चौका र ३ छक्का सहित सर्वाधिक ७२ रनको योगदान दिए । निसांका बाहेक अन्य कुनैपनि श्रीलंका ब्याटरले राम्रो प्रदर्शन गर्न सकेनन् । दक्षिण अफ्रिका बलिङ सामु श्रीलंकाका ८ खेलाडीले दोहोरो अंकमा रन जोड्न सकेनन् । निसांकाको एकल प्रयासमा श्रीलंकाले मध्यम योगपफल बनाएको छ ।

चरिथ असलंकाले १४ बलमा २ चौका र १ छक्का सहित २१ रनमा रन आउट भए । तीव्र गतिका बलर एनरिच नोर्कियाले तेस्रो ओभरको चौथो बलमा ओपनर कुशल परेरालाई ७ रनमा बोल्ड आउट गर्दै दक्षिण अफ्रिकालाई पहिलो सफलता दिलाएका थिए । नवौं ओभरको पाँचौं बलमा असलंका रन आउट हुन पुगेका थिए । अर्को ओभरमा स्पिनर तबरेज शाम्सीले भानुका राजपक्षेलाई शून्यमा कट एण्ड बोल्ड आउट गरे ।

१२ औं ओभरको चौथो बलमा शाम्सीलेनै अविष्का फर्नान्डोलाई ३ रनमा कट एड बोल्ड आउट गरेपछि श्रीलंका समस्यामा परेको थियो । वानिन्दु हसरंगा ४ रनमा एडेन माक्ररमबाट क्याच हुँदा श्रीलंका १३.४ ओभरमा ९१–५ को कमजोर अवस्थामा पुगेको थियो । तल्लोक्रमका दासुन शनका ११, चामिका करुणारत्ने ५, दुश्मन्था चामिराले ३ र महेश थेक्सानले रन बनाए ।

दक्षिण अफ्रिका स्पिनर तबरेज शाम्सीले ४ ओभरमा १७ रन खर्चेर ३ विकेट लिए । ड्वेन प्रिटियोरेसले ३ ओभरमा १७ रन खर्चेर ३ विकेट लिए । एनरिच नोर्कियाले ४ ओभरमा २७ रन खर्चेर २ विकेट लिए ।