एजेन्सी – आइसिसी टि२० विश्वकप २०२१ मा दक्षिण अफ्रिकाले श्रीलंकामाथि ४ विकेटको रोमान्चक जित हात पारेको छ । योसँगै सुपर १२ को समूह १ मा रहेको दक्षिण अफ्रिकाले शीर्ष दुईमा रहेर सेमिफाइनल खेल्ने सम्भावना कायमै राखेको छ ।

अन्तिम ओभरमा जितको लागि १५ रन चाहिँएको अवस्थामा डेविड मिलरले लाहिरु कुमारालाई लगातार दुई छक्का प्रहार गर्दै दक्षिण अफ्रिका जित पक्का बनाएका थिए । जितको लागि १ सय ४३ रनको विजयी लक्ष्य पछ्याएको दक्षिण अफ्रिकाले १९.५ ओभरमा ६ विकेट गुमाउँदै पूरा गर्यो । दक्षिण अफ्रिका कप्तान टेम्बा बभुमाले ४६ बलमा १ चौका र १ छक्का सहित सर्वाधिक ४६ रनको योगदान दिए । डेविड मिलर १३ बलमा २ छक्का सहित २३ रनमा अविजित रहे । कागिसो रबाडा ७ बलमा १ चौका र १ छक्का सहित १३ रनमा अविजित रहे ।

अन्तिम ओभरको पहिलो बलमा कागिसो रबाडाले एक रन लिए । दोस्रो र तेस्रो बलमा लाहिरु कुमारालाई मिलरले लगातार छक्का प्रहार गरेपछि जित पक्का भएको थियो । चौथो बलमा एक रन लिँदा पाँचौं बलमा कागिसो रबाडाले चौका प्रहार गर्दै खेल सकाएका थिए ।
स्पिनर वानिन्दु हसरंगाले १८ औं ओभरमा ह्याट्रिक पूरा गरेका थिए । १५ औं ओभरको अन्तिम बलमा एडेन माक्ररमलाई डि सिल्भाबाट १९ रनमा क्याच गराएका थिए ।

१८ औं ओभरको पहिलो बलमै वानिन्दुले कप्तान टेम्बा बभुमालाई पाथुम निसांकाबाट क्याच गराएका थिए । अर्को बलमा ड्वेन प्रिटियोरियस डि सिल्भाबाट लङअफमा समातिन पुगेपछि वानिन्दुले ह्याट्रियक लिएका थिए । तर टोली भने पराजित हुन पुग्यो । वानिन्दु टि२० विश्वकपमा ह्याट्रिक लिने तेस्रो खेलाडी हुन् । यसअघि सन् २००७ मा अष्ट्रेलिया तीव्र गतिका बलर ब्रेट लीले बंगलादेशविरुद्ध र यसै विश्वकपमा आयरल्यान्डका कर्टिस क्याम्फरले नेदरल्यान्ड्सविरुद्ध ह्याट्रिक लिएका थिए ।

ओपनर क्विन्टन डि कक १२, रिजा हेनड्रिक्स ११, रास्सी भान डर डुसेन १६ र एडेन माक्ररमले १९ रनमा आउट भए । श्रीलंका स्पिनर वानिन्दु हसरंगाले ४ ओभरमा २० रन खर्चेर ३ विकेट लिए । दुश्मन्था चामिराले ४ ओभरमा २७ रन खर्चेर २ विकेट लिए ।

त्यसअघि शारजाह क्रिकेट स्टेडियममा टस हारेर पहिला ब्याटिङ थालेको श्रीलंका २० ओभरमा १ सय ४२ रनमा अल आउट भएको थियो । श्रीलंकाका पाथुम निसांकाले ५८ बलमा ६ चौका र ३ छक्का सहित सर्वाधिक ७२ रनको योगदान दिए । निसांका बाहेक अन्य कुनैपनि श्रीलंका ब्याटरले राम्रो प्रदर्शन गर्न सकेनन् । दक्षिण अफ्रिका बलिङ सामु श्रीलंकाका ८ खेलाडीले दोहोरो अंकमा रन जोड्न सकेनन् । निसांकाको एकल प्रयासमा श्रीलंकाले मध्यम योगपफल बनाएको छ ।

चरिथ असलंकाले १४ बलमा २ चौका र १ छक्का सहित २१ रनमा रन आउट भए । तीव्र गतिका बलर एनरिच नोर्कियाले तेस्रो ओभरको चौथो बलमा ओपनर कुशल परेरालाई ७ रनमा बोल्ड आउट गर्दै दक्षिण अफ्रिकालाई पहिलो सफलता दिलाएका थिए । नवौं ओभरको पाँचौं बलमा असलंका रन आउट हुन पुगेका थिए । अर्को ओभरमा स्पिनर तबरेज शाम्सीले भानुका राजपक्षेलाई शून्यमा कट एण्ड बोल्ड आउट गरे ।

१२ औं ओभरको चौथो बलमा शाम्सीलेनै अविष्का फर्नान्डोलाई ३ रनमा कट एड बोल्ड आउट गरेपछि श्रीलंका समस्यामा परेको थियो । वानिन्दु हसरंगा ४ रनमा एडेन माक्ररमबाट क्याच हुँदा श्रीलंका १३।४ ओभरमा ९१–५ को कमजोर अवस्थामा पुगेको थियो । तल्लोक्रमका दासुन शनका ११, चामिका करुणारत्ने ५, दुश्मन्था चामिराले ३ र महेश थेक्सानले रन बनाए ।

दक्षिण अफ्रिका स्पिनर तबरेज शाम्सीले ४ ओभरमा १७ रन खर्चेर ३ विकेट लिए । ड्वेन प्रिटियोरेसले ३ ओभरमा १७ रन खर्चेर ३ विकेट लिए । एनरिच नोर्कियाले ४ ओभरमा २७ रन खर्चेर २ विकेट लिए ।

दक्षिण अफ्रिका पहिलो खेलमा अष्ट्रेलियासँग ५ विकेटले पराजित भएको थियो । दोस्रो खेलमा वेस्टइन्डिजलाई ८ विकेटले हराएको थियो । श्रीलंकाले पहिलो चरणको समूह ए को विजेता रुपमा सुपर १२ मा स्थान बनाएको थियो । श्रीलंकाले सुपर १२ को पहिलो खेलमा बंगलादेशलाई ५ विकेटले हराएको थियो । तर दोस्रो खेलमा श्रीलंका अष्ट्रेलियासँग ७ विकेटले हराएको थियो । दक्षिण अफ्रिकाले मंगलबार बंगलादेशसँग खेल्नेछ । श्रीलंकाले सोमबार इंग्ल्यान्डसँग खेल्नेछ ।

अंक तालिका

सुपर १२ को समूह १ मा इंग्ल्यान्ड २ खेलमा २ मानै जितका साथ ४ अंक जोड्दै शीर्षस्थानमा छ । अष्ट्रेलिया २ खेलमा समान नतिजाका साथ ४ अंक भएपनि नेट रनरेटका आधारमा दोस्रो स्थानमा छ । ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा दक्षिण अफ्रिका तेस्रो स्थानमा छ । श्रीलंका ३ खेलमा १ मा जित र २ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान २ खेलमा १ मा जित र १ मा हार सहित दोस्रो स्थानमा छ । नामिबिया १ खेलमा २ अंकका साथ तेस्रो स्थानमा छ । अंक बिहीन न्युजिल्यान्ड चौथो, भारत पाँचौं र स्कटल्यान्ड पुछारमा छन् ।