एजेन्सी – उपाधिको दाबेदार इंग्ल्यान्डले आइसिसी टि२० विश्वकप २०२१ मा लगातार तेस्रो जित हात पारेको छ । सुपर १२ को समूह १ मा रहेको इंग्ल्यान्डले अष्ट्रेलियालाई ८ विकेटले हराउँदै सेमिफाइनल नजिक पुगेको छ ।

जितको लागि १ सय २६ रनको विजयी लक्ष्य पछ्याएको इंग्ल्यान्डले ११.४ ओभरमा २ विकेटको क्षतिमा पूरा गर्यो । इंग्ल्यान्डको जितमा ओपनर जस बटलर ३२ बलमा ५ चौका र ५ छक्का सहित ७१ रनमा अविजित रहे । अर्का ओपनर जेसन रोयले २० बलमा १ चौका र १ छक्का सहित २२ रनमा एडम जाम्पाको बलमा एलबीडब्लू आउट भए ।

डेविड मलान ८ रनमा आउट भए । जोनी बेयरस्टो ११ बलमा २ छक्का सहित १६ रनमा अविजित रहे । इंग्ल्यान्डलाई ओपनर रोय र बटलरले पहिलो विकेटका लागि ६.२ ओभरमा ६६ रनको साझेदारी गर्दै राम्रो सुरुवात दिलाएका थिए । अष्ट्रेलियाका स्पिनर एडम जाम्पा र एश्टन अगरले १–१ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङको निम्तो पाएको अष्ट्रेलिया निर्धारित २० ओभरमा १ सय २५ रनमा अल आउट भयो । अष्ट्रेलिया ओपनर तथा कप्तान आरोन फिन्चले ४९ बलमा ४ चौका सहित सर्वाधिक ४४ रनको योगदान दिए । तीव्र गतिका बलर क्रिस वोक्सले दोस्रो ओभरको दोस्रो बलमा ओपनर डेविड वार्नरलाई जस बटलरबाट १ रनमा क्याच गराउँदै पहिलो सफलता दिलाएका थिए । तेस्रो ओभरको पहिलो बलमै क्रिस जोर्डनले वोक्सबाट अष्ट्रेलिया प्रमुख ब्याटर स्टिभ स्मिथलाई १ रनमा क्याच गराएका थिए ।

चौथो ओभरको पाँचौं बलमा वोक्सले ग्लेन म्याक्सवेललाई ६ रनमा एलबीडब्लू आउट गरेपछि अष्ट्रेलिया १५–३ को कमजोर अवस्थामा पुगेको थियो । स्पिनर आदिल राशिदले मार्कस स्टोइनिसलाई शून्यमा एलबीडब्लू आउट गर्दा अष्ट्रेलिया ६।१ ओभरमा २१–४ को दयनीय अवस्थामा पुगेको थियो ।

विकेटकिपर म्याथ्यु वेड १८ बलमा २ चौका सहित १८ रनमा क्याच आउट भए । वेडलाई लियाम लिभिङस्टोनले जेसन रोयबाट क्याच गराएका थिए । तल्लोक्रममा एश्टन अगर २० बलमा २ छक्का सहित २० रनमा क्याच आउट भए । प्याट कमिन्सले ३ बलमा २ छक्का सहित १२ रनमा आउट भए । मिचेल स्टार्कले ६ बलमा १ चौका र १ छक्का सहित १३ रन बनाए ।

इंग्ल्यान्डका क्रिस वोक्सले ४ ओभरमा २३ रन खर्चेर २ विकेट लिए । क्रिस जोर्डनले ४ ओभरमा १७ रन खर्चेर सर्वाधिक ३ विकेट लिए । टाइमल मिल्सले २, आदिल राशिद र लियाम लिभिङस्टोनले १–१ विकेट लिए ।

इंग्ल्यान्डले पहिलो खेलमा वेस्टइन्डिजलाई ६ विकेट र बंगलादेशलाई ८ विकेटले हराएको थियो । अष्ट्रेलियाले पहिलो खेलमा दक्षिण अफ्रिकालाई ५ विकेट र दोस्रो खेलमा श्रीलंकालाई ७ विकेटले पराजित थियो । इंग्ल्यान्डले अव सोमबार श्रीलंकासँग खेल्नेछ । अष्ट्रेलियाले बिहीबार बंगलादेशसँग खेल्नेछ ।

अंक तालिका

सुपर १२ को समूह १ मा इंग्ल्यान्ड ३ खेलमा ३ मानै जितका साथ ६ अंक जोड्दै शीर्षस्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ दोस्रो स्थानमा छ । ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा दक्षिण अफ्रिका तेस्रो स्थानमा छ । श्रीलंका ३ खेलमा १ मा जित र २ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान २ खेलमा १ मा जित र १ मा हार सहित दोस्रो स्थानमा छ । नामिबिया १ खेलमा २ अंकका साथ तेस्रो स्थानमा छ । अंक बिहीन न्युजिल्यान्ड चौथो, भारत पाँचौं र स्कटल्यान्ड पुछारमा छन् ।