एजेन्सी – आइसिसी टि२० विश्वकप २०२१ मा लगातार दोस्रो हार बेहोरेपछि भारतको सेमिफाइनल यात्रा कठिन बनेको छ । पहिलो खेलमा भारत पाकिस्तानसँग १० विकेटले पराजित भएको थियो । आइतबार न्युजिल्यान्डसँग ८ विकेटले पराजित भएको थियो ।

लगातार दुई फराकिलो हारपछि भारतको सेमिफाइनल यात्रा कठिन बनेको छ । तर सेमिफाइनल दौडबाट बाहिरी सकेको भने छैन । भारत आफ्नो सर्वोत्कृष्ट प्रदर्शनसँगै अन्य टोलीको नतिजा आफू अनुकुल आएमा सबैलाई आश्चर्य पार्दै सेमिफाइनलमा पुग्न सक्छ । त्यसको लागि पहिला भारतले बाँकी तीनै खेलमा फराकिलो जित निकाल्नुपर्ने हुन्छ ।

जित मात्र होईन नेट रनरेटमा पनि त्यतिनै ध्यान दिनुपर्छ । किनभने भारतको नेट रनरेट सुरुवाती लज्जास्पद हारले निकै कमजोर छ । सुपर १२ को समूह २ बाट पाकिस्तान सेमिफाइनलमा पुग्ने निश्चित जस्तै भएको छ ।

भारतको सेमिफाइनल पुग्ने अंक गणीतिय सम्भावना

सुपर १२ को समूह २ बाट पाकिस्तान ५ खेलमा ५ मानै जितका साथ १० अंक जोड्दै शीर्ष स्थानका साथ सेमिफाइनल खेल्ने सम्भावना छ । पाकिस्तानले शीर्ष तीन टोली भारत, न्युजिल्यान्ड र अफगानिस्तानलाई पराजित गरि सकेको छ । अव नामिबिया र स्कटल्यान्डसँग खेल्न बाँकी छ । यी दुवै खेल जित्दै शीर्ष स्थानका साथ सेमिफाइनल खेल्नेछ ।

स्कटल्यान्ड र नामिबियाको नतिजाले अन्य टोलीको समिकरणलाई धेरै प्रभाव पार्नेछ । दोस्रो स्थानको लागि भारत, अफगानिस्तान र न्युजिल्यान्ड दौडमा छन् । जसमा न्युजिल्यान्डको सम्भावना बलियो छ ।

भारतले अब बुधबार अफगानिस्तानसँग खेल्नेछ । उक्त खेलमा भारतले फराकिलो जित निकाल्नुपर्ने हुन्छ । शुक्रबार स्कटल्यान्ड र सोमबार नामिबियासँग खेल्नेछ । तीनै खेलमा विजयी हुँदा भारतको ६ अंक हुनेछ । ६ अंकसँगै नेटरनरेट पनि उच्च हुनुपर्छ । तीनै खेलमा भारतको जित फराकिलो हुनुपर्छ ।

अफगानिस्तान अन्तिम खेलमा न्युजिल्यान्डसँग पराजित भएमा उसको ५ खेलमा ३ मा जित र २ मा हार सहित ४ अंक मात्र हुनेछ । ४ अंकले सेमिफाइनलमा पुग्न सक्दैन । अफगानिस्तानमाथि न्युजिल्यान्डको जितको अन्तर कम हुँदा भारतलाई फाइदा पुग्नेछ ।न्युजिल्यान्डले बुधबार स्कटल्यान्ड र शुक्रबार नामिबियासँग खेल्नेछ ।

उक्त दुबै खेलमा पराजित भएमा न्युजिल्यान्डको ४ अंक हुनेछ । जसले गर्दा भारत ६ अंकका साथ दोस्रो स्थानमा रहँदै सेमिफाइनल खेल्न सक्छ । न्युजिल्यान्डले स्कटल्यान्ड वा नामिबिया मध्य एक टोलीसँग पराजित हुँदा पनि ६ अंकमा रोकिनेछ । भारतको पनि ६ अंकनै हुनेछ । न्युजिल्यान्डको नेटरनरेट प्लस ०.७६५ छ । भारतको माइनस १.६०९ छ ।

विशाल जितका साथ नेट रनरेटले पछि पार्दै सेमिफाइलमा पुग्नसक्छ । न्युजिल्यान्ड अफगानिस्तानसँग पराजित भएको खण्डमा भारतको कम सम्भावना हुन्छ । भारतको तीनै खेलको जितको अन्तर १ सय ५० को आसपासमा हुनुपर्ने छ । अफगानिस्तानको नेट रनरेट प्लस ३.०९७ छ । भारतको माइनस १.६०९ छ ।

भारतले अफगानिस्तानलाई फराकिलो अन्तरले हराउँदा उसको नेट रनरेटमा गिरावट आउँछ । अफगानिस्तानले न्युजिल्यान्डलाई झिनो अन्तरले हराएमा नेटनरेटमा भारत अघि जानसक्छ । कम्तिमा न्युजिल्यान्डले बाँकी तीन मध्य एक खेलमा हारेको खण्डमा मात्र भारत नेटरनरेटको आधारमा सेमिफाइनलमा पुग्न सक्ने झिनो अंक गणीतिय सम्भावना छ ।

यो पनि पढ्नुहोस् : भारतको हातमा छैन सेमिफाइनल पुग्ने समिकरण

भारतले न्युजिल्यान्डसँग हार्नुका पाँच कारण