एजेन्सी – लगातार चौथो जितसँगै इंग्ल्यान्ड संयुक्त अरव इमिरेट्स (युएई) मा जारी टि२० विश्वकप २०२१ को सेमिफाइनलमा प्रवेश गरेको छ । सुपर १२ को समूह १ मा रहेको इंग्ल्यान्डले सोमबार राती श्रीलंकालाई २६ रनले हराउँदै सेमिफाइनलमा स्थान पक्का गराएको छ । श्रीलंका भने समूह चरणबाटै बाहिरिएको छ ।

जितको लागि १ सय ६४ रनको विजयी लक्ष्य पछ्याएको श्रीलंका १९ ओभरमा १ सय ३७ रनमा अल आउट भयो । श्रीलंकाका वानिन्दु हसरंगाले २१ बलमा ३ चौका र १ छक्का सहित सर्वाधिक ३४ रनको योगदान दिए । भानुका राजपक्षे र दासुन शनाका २६–२६ रनमा आउट भए । ओपनर पाथुम निसांका १ र कुशल परेरा ७ रनमा आउट भएका थिए । चारिथ असलंका २१ र अविष्का फर्नान्डो १३ रनमा आउट भए ।

इंग्ल्यान्डका आदिल राशिदले ४ ओभरमा १९ रन खर्चेर २ विकेट लिए । तीव्र गतिका बलर क्रिस जोर्डनले ४ ओभरमा २४ रन खर्चेर २ विकेट लिए । मोईन अलीले ३ ओभरमा १५ रन खर्चेर २ विकेट लिए । क्रिस वोक्स र लियाम लिभिङस्टोनले १–१ विकेट लिए ।

त्यसअघि शारजाह क्रिकेट स्टेडियममा टस हारेर ब्याटिङको निम्तो पाएको इंग्ल्यान्डले निर्धारित २० ओभरमा ४ विकेट गुमाउँदै १ सय ६३ रन बनाएको थियो । इंग्ल्यान्डका ओपनर जस बटलरले ६७ बलमा ६ चौका र ६ छक्का सहित १ सय १ रनको अविजित शतकीय इनिङ खेलेका थिए । उनको यो टि२० आई करिअरको पहिलो शतक हो ।

इंग्ल्यान्डबाट यसअघि एलेक्स हेल्स, डेविड मलान र लियाम लिभिङस्टोनले टि२० आईमा शतक प्रहार गरेका थिए । बटलरले २० औं ओभरको अन्तिम बलमा तीव्र गतिका बलर दुश्मन्था चामिरालाई छक्का प्रहार गर्दै शतक पूरा गरेका थिए । इंग्ल्यान्डबाट तीनै शैलीमा शतक प्रहार गर्ने बटलर पहिलो खेलाडी बनेका छन् ।

बटलरले आफ्नो उच्च लयलाई निरन्तरता दिएका छन् । यसअघिको खेलमा अष्ट्रेलियाविरुद्ध बटलरले ७१ रनको अविजित इनिङ खेलेका थिए । ओईन मोर्गन ३६ बलमा १ बलमा चौका र ३ छक्का सहित ४० रनमा आउट भए । खराब सुरुवात गर्नेक्रममा एक समय इंग्ल्यान्ड ५.२ ओभरमा ३५–३ को कमजोर अवस्थामा पुगेको थियो । चौथो विकेटका लागि ओईन मोर्गन र जस बटलरले ७८ बलमा १ सय १२ रनको उत्कृष्ट शतकीय साझेदारीका साथ बलियो योगफलमा पुर्याएका हुन् । दोस्रो ओभरको दोस्रो बलमै स्पिनर वानिन्दु हसरंगाले ओपनर जेसन रोयलाई ९ रनमा बोल्ड आउट गरेका थिए ।

तीव्र गतिका बलर दुश्मन्था चामिराले छैटौं ओभरको अन्तिम बलमा डेविड मलानलाई ६ रनमा बोल्ड आउट गरे । हसंरगाले जोनी बेयरस्टोलाई शून्यमा एलबीडब्लू आउट गर्दा इंग्ल्यान्डले खराब सुरुवात गरेको थियो । श्रीलंका स्पिनर वानिन्दु हसरंगाले ४ ओभरमा २१ रन खर्चेर ३ विकेट लिए ।

 इंग्ल्यान्डले पहिलो खेलमा वेस्टइन्डिजलाई ६ विकेट, दोस्रो खेलमा बंगलादेश र तेस्रो खेलमा अष्ट्रेलियालाई समान ८ विकेटले पराजित गरेको थियो । पहिलो चरणको समूह ए को विजेता श्रीलंकाले सुपर १२ को पहिलो खेलमा बंगलादेशलाई ५ विकेटले हराएको थियो । अष्ट्रेलियासँग ७ विकेट र दक्षिण अफ्रिकासँग ४ विकेटले पराजित भएको थियो । इंग्ल्यान्डले शनिबार अन्तिम खेलमा दक्षिण अफ्रिकासँग खेल्नेछ । श्रीलंकाले बिहीबार आफ्नो अन्तिम खेल वेस्टइन्डिजसँग खेल्नेछ । सेमिफाइनलमा इंग्ल्यान्डले सुपर १२ को समूह २ को उपविजेतासँग खेल्नेछ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । दक्षिण अफ्रिकाको ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा दोस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया २ खेलमा १ मा जित र १ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।

यो पनि पढ्नुहोस् : यस्तो छ भारत सेमिफाइनल पुग्ने समिकरण

भारतको हातमा छैन सेमिफाइनल पुग्ने समिकरण