एजेन्सी – दक्षिण अफ्रिकाले आइसिसी टि२० विश्वकप २०२१ मा बंगलादेशमाथि सहज जित हात पार्दै सेमिफाइनलको सम्भावना कायमै राखेको छ । मंगलबार दक्षिण अफ्रिकाले बंगलादेशलाई ६ विकेटले हराउँदै सुपर १२ को समूह १ बाट शीर्ष दुईमा आफ्नो स्थान मजबुत बनाएको छ ।

जितको लागि ८५ रनको सामान्य विजयी लक्ष्य दक्षिण अफ्रिकाले १३.३ ओभरमा ४ विकेटको क्षतिमा पूरा गर्यो । दक्षिण अफ्रिकाको जितमा कप्तान टेम्बा बभुमा २८ बलमा ३ चौका र १ छक्का सहित ३१ रनमा अविजित रहे । रास्सी भान डर डुसेन २२, ओपनर क्विन्टन डी कक १६, रिजा हेन्डिक्स ४ र एडेन माक्ररम शून्यमा आउट भए । बंगलादेशका तस्किन अहमदले २ विकेट लिए । नासुम अहमद र माहेदी हसनले १-१ विकेट लिए ।

त्यसअघि शेख जायद स्टेडिम आबूधाबीमा टस हारेर ब्याटिङको निम्तो पाएको बंगलादेश १८.२ ओभरमा ८४ रनमा अल आउट भएको थियो । बंगलादेशका माहेदी हसनले २५ बलमा २ चौका र १ छक्का सहित सर्वाधिक सर्वाधिक २७ रनको योगदान दिए । ओपनर लिटन दासले ३६ बलमा १ चौका सहित सर्वाधिक २४ रन जोडे । बंगलादेशका ८ खेलाडीले दोहोरो अंकमा रन बनाउन सकेनन् । पाँच खेलाडीले खाता नखोली आउट भएका थिए ।

तीव्र गतिका बलर कागिसो रबाडाले चौथो ओभरको पाँचौं बलमा ओपनर मोहम्मद नईम शेखलाई ९ रनमा रिजा हेनड्रिक्सबाट क्याच गराएका थिए । अर्को बलमा सौम्य सरकारलाई शून्यमा एलबीडब्लू आउट गर्दै गोल्डेन डक पेभेलिएन फर्काए । रबाडालेनै मुश्फिकुर रहिमलाई छैटौं ओभरको तेस्रो बलमा शून्यमा क्याच गराएपछि बंगलादेशले खराब सुरुवात गरेको थियो ।

एनरिच नोर्कियाले महमुदूल्ला रियादलाई ३ रनमा एडेन माक्ररमबाट क्याच गराए । स्पिनर तरबेज शाम्सीले दासलाई एलबीडब्लू आउट गराएका थिए । अफिफ हुसैन गोल्डेन डक र शमिम हसैन ११ रनमा आउट भए ।

दक्षिण अफ्रिका कागिसो रबाडाले ४ ओभरमा २० रन खर्चेर सर्वाधिक ३ विकेट लिए । अर्का तीव्र गतिका बलर एनरिच नोर्कियाले ३।२ ओभरमा ८ रन खर्चेर ३ विकेट लिए । स्पिनर तबरेज शाम्सीले ३ ओभरमा १४ रन खर्चेर २ विकेट लिए । ड्वेन प्रिटोरियसको नाममा १ विकेट रह्यो ।

दक्षिण अफ्रिकाले पहिलो खेलमा अष्ट्रेलियासँग ५ विकेटले हारेको थियो । दोस्रो खेलमा वेस्टइन्डिजलाई ८ विकेट र श्रीलंकालाई ४ विकेटले हराएको थियो ।

दक्षिण अफ्रिका ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । अन्तिम खेलमा दक्षिण अफ्रिकाले इंग्ल्यान्डसँग खेल्नेछ । शनिबार हुने उक्त खेलमा दक्षिण अफ्रिका विजयी भएमा नेटरनरेटको आधारमा सेमिफाइनलमा पुग्ने सम्भावना छ । तर अष्ट्रेलिया नतिजामा पर्खनु पर्छ । अष्ट्रेलिया ३ खेलमा २ मा जित र १ मा हार सहित ४ अंक छ । बाँकी दुई खेल अष्ट्रेलियाले बंगलादेश र वेस्टइन्डिजलाई पराजित गरेमा ८ अंक हुनेछ । दुबै टोलीको समान ८ अंक भएमा नेटरनरेटको आधारमा एक टोली सेमिफाइनलमा पुग्नेछन् ।

समूह १ बाट इंग्ल्यान्डले ४ खेलमा ४ मानै जितका साथ सेमिफाइनलमा पुगि सकेको छ । श्रीलंका र बंगलादेश औपचारिक रुपमा बाहिरिएका छन् । वेस्टइन्डिज ३ खेलमा २ मा हार र १ मा जित सहित पाँचौं स्थानमा छ । अन्तिम दुई खेलमा श्रीलंका र अष्ट्रेलियासँग खेल्न बाँकी छ । वेस्टइन्डिज अन्तिम खेलमा दक्षिण अफ्रिका पराजित हुँदा र बाँकी दुबै खेलमा विशाल जित हात पार्दै ६ अंकका साथ सेमिफाइनल खेल्ने झिनो आशामा छ ।

समूह २ मा भने पाकिस्तान ३ खेलमा ३ मानै जितका साथ सेमिफाइनल पक्का बनाएको छ । न्युजिल्यान्ड र अफगानिस्तानको बलियो सम्भावना छ । भारतको झिनो अंक गणीतिय सम्भावना छ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंकका साथ दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ४ खेलमा ४ मानै पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया २ खेलमा १ मा जित र १ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।

यो पनि पढ्नुहोस् : यस्तो छ भारत सेमिफाइनल पुग्ने समिकरण

भारतको हातमा छैन सेमिफाइनल पुग्ने समिकरण