एजेन्सी – भारतीय क्रिकेट टोलीका कप्तान विराट कोहलीले टि२० कप्तानको रुपमा आज अन्तिम खेल खेल्दैछन् । आइसिसी टि२० विश्वकप २०२१ को सुपर १२ को अन्तिम खेलमा आज भारत र नामिबियाबीच प्रतिस्पर्धा हुँदैछ । यस खेलसँगै विराटको टि२० खेलमा कप्तानी यात्रा सकिनेछ ।

कोहलीले टि२० विश्वकपपछि कप्तानी छाड्ने भदौ अन्तिममा घोषणा गरेका थिए । इन्डियन प्रिमियर लिग (आइपिएल) मा यस सिजनसँगै कोहलीले रोयल च्यालेन्जर्स बेंगलोरको कप्तानी पनि छाडि सकेका छन् । कोहली आफ्नो प्रदर्शनमा थप ध्यानदिन टि२० कप्तानी छाड्न लागेका हुन् । अव कोहली कप्तानको रुपमा टि२० क्रिकेटमा देखिनेछैनन् । भारतीय ओडिआई र टेस्टमा भने कोहलीले निरन्तर कप्तानी गर्नेछन् । खेलाडीको रुपमा भने कोहलीले सबै खेलका शैलीका खेल खेल्ने छन् ।

कोहलीले २०१७ देखि भारतीय टि२० टोलीको कप्तानी थालेका हुन् । कोहलीको कप्तानीमा भारतले ४९ टि२० आई खेलमा २९ मा जित र १६ मा पराजित भएको छ । समान दुई खेल बराबरी र २ खेल नतिजा बिहीन छ । कोहलीले २०१३ देखि २०२१ सम्म बेंगलोरको कप्तानी गरे । आइपिएलमा १ सय ४० खेलमा कप्तानी गर्दा ६४ खेलमा जित, ६९ खेलमा हार र ४ खेलको नजिता विहिन छ । विराटको कप्तानीमा बेंगलोरले २०१६ को आइपिएल फाइनल खेलेको थियो ।

फाइनलमा बेंगलोर सनराइजर्स हैदराबादसँग ८ रनले पराजित हुन पुगेको थियो । विराटको कप्तानीमा बेंगलोर २०१५, २०२० र २०२१ को सिजनमा प्लेअफ सम्म यात्रा तय गरेको थियो । अन्य सिजनमा लिग चरणबाटै बाहिरिएको थियो । विराट टि२० आई क्रिकेटका सर्वाधिक सफल खेलाडी हुन् । कोहलीले ९४ टि२० आई खेलमा २९ अर्धशतक सहित कुल ३ हजार २ सय २७ रन बनाएका छन् ।

कोहलीले आफ्नो कप्तानीमा भारतलाई कुनैपनि आइसिसी उपाधि जिताउन सकेका छैनन् । कोहली आइपिएलमा पनि उपाधि विहीन बने । उपाधि विहीनको कारण कप्तानी छाड्न दबाब पर्दै आएको थियो । यस विश्वकपमा भारत ४ खेलमा २ मा जित र २ मा हार सहित ४ अंकका साथ तेस्रो स्थानमा रहेर बाहिरी सकेको छ । आज राती अन्तिम खेलमा नामिबियासँग खेल्दै भारतले विश्वकप २०२१ सकाउनेछ ।

अव भारतीय क्रिकेट टोलीको कप्तान रोहित शर्मा वा लोकेश राहुल मध्य एकले गर्ने उच्च सम्भावना छ । रोहितले आइपिएलमा मुम्बई इन्डियन्सलाई ५ उपाधि जिताउँदै सफल कप्तानको छवि छाडेका छन् । राहुलले किंग्स इलेभेन पन्जाबको कप्तानी गर्दै उत्कृष्ट प्रदर्शन गर्दै आएका छन् । भारतले कप्तानी छनोटमा दीर्घकालिन योजनामा ध्यान दिँदै आएको छ ।

रोहितले अव बढीमा एक दुई वर्ष भारतबाट खेल्ने देखिन्छ । यो अवस्थामा भारत राहुललाई दीर्घकालिन कप्तान बनाउन सक्छ । निरन्तर कप्तान परिवर्तनले टिम निर्माणमा ठूलो धक्का र असर पर्न सक्छ । तेस्रो रोजाईमा विकेटकिपर ऋषभ पन्त देखिन्छन् । भारतले मुख्य प्रशिक्षकमा राहुल द्रविडलाई नियुक्त गरि सकेको छ ।

भारतले अव घरेलु मैदानमा न्युजिल्यान्डसँग तीन टि२० आई र दुई टेस्ट खेल खेल्ने कार्यक्रम छ । पहिलो टि२० खेल १७ नोभेम्बरमा जयपुरमा हुनेछ ।

यो पनि पढ्नुहोस् : कोहलीपछि भारतीय टोलीको कप्तानी गर्न सक्ने यी ३ खेलाडी