एजेन्सी – उपाधिको दाबेदार इंग्ल्यान्डलाई आइसिसी टि२० विश्वकप २०२१ मा सेमिफइनल खेल्नु अघि ठूलो झड्का लागेको छ । इंग्ल्यान्डका ओपनर जेसन रोयले टि२० विश्वकप २०२१ को बाँकी खेल गुमाउने इंग्ल्यान्ड क्रिकेट बोर्डले जनाएको छ । रोय सुपर १२ को समूह १ मा दक्षिण अफ्रिकाविरुद्ध ब्याटिङ गर्नेक्रममा खुट्टाको मांशपेशी समस्याको कारण पेभेलिएन फर्केका थिए ।

यस विश्वकपमा रोयले ५ खेलमा १ सय २३ रन बनाएका थिए । बंगलादेशलाई ८ विकेटले हराउन रोयले ३८ बलमा ६१ रनको इनिङ खेल्दै प्लेयर अफ द म्याच चुनिएका थिए । रोयको स्थानमा इंग्ल्यान्डले जेम्श भिन्सलाई मौका दिएको छ । ३० वर्षिय भिन्सले इंग्ल्यान्डबाट १२ टि२० आई, १३ टेस्ट र १९ ओडिआई खेल खेलेका छन् । २ सय ६७ टि२० खेलमा भिन्सले २ शतक र ४४ अर्धशतक सहित ७ हजार १ सय ४६ रन बनाएका छन् ।
रोय आउट हुँदा इंग्ल्यान्डको ओपनिङ जस बटलर र जोनी बेयरस्टोले गर्नेछन् । बेयरस्टोले मध्यक्रममा ब्याटिङ गर्दै आएका थिए । मध्यक्रममा इंग्ल्यान्डले साम बिलिंग्सलाई मौका दिने सम्भावना छ । मध्यक्रममा केहि असर पर्नसक्छ । चोटका कारण टि२० विश्वकप गुमाउने रोय इंग्ल्यान्डका तेस्रो खेलाडी हुन् । यसअघि तीव्र गतिका बलर टाइमल मिल्सको स्थानमा रोस टोपलीले लिई सकेका छन् । प्रतियोगिता सुरु हुनुअघिनै अलराउन्डर साम करन घाइते हुँदा उनका दाइ टम करनले स्थान लिएका थिए ।

इंग्ल्यान्ड सुपर १२ को समूह १ मा ५ खेलमा ४ मा जित र १ मा हार सहित ८ अंक जोड्दै नेटरनरेटको आधारमा शीर्षस्थानमा रहेर सेमिफाइनल खेलेको हो । सेमिफाइनलमा बुधबार इंग्ल्यान्डले न्युजिल्यान्डसँग खेल्नेछ । समूह २ को विजेता पाकिस्तानले बिहीबार अष्ट्रेलियासँग दोस्रो सेमिफाइनलमा प्रतिस्पर्धा गर्नेछन् । फाइनल आइतबार हुनेछ ।