एजेन्सी – इंग्लिस क्लब म्यानचेस्टर युनाइटेडले आफ्नो प्रशिक्षक ओले गनर सोल्सायरलाई बर्खास्त गरेको छ । प्रिमियर लिग अन्र्तगत वाट्फोर्डसँग लज्जास्पद हार बेहोरेपछि क्लबले प्रशिक्षक सोल्सायरलाई बर्खास्त गरेको हो ।

प्रिमियर लिगमा शनिबार राति म्यानचेस्टर युनाइटेड घरेलु टोली वाट्फोर्डसँग ४–१ ले पराजित भएको थियो । वाट्फोर्डसँगको हारसँगै प्रशिक्षक सोल्सायरसहित बसेको क्लबको बोर्ड बैठकले उनलाई बर्खास्त गर्ने निर्णय गरेको हो ।

झन्डै ५ घन्टा चलेको आन्तरिक छलफलबाट आपसी समझदारीमै सोल्सायरलाई प्रशिक्षणको जिम्मेवारीबाट हटाउने सहमति भएको बताइएको छ । उनको स्थानमा माइकल क्यारिकलाई अन्तरिम प्रशिक्षकमा नियुक्त गरेको छ ।

यो सिजन युनाइटेडले सोचेअनुरुपको प्रदर्शन गर्न नसक्दा उनीको जागिर धरापमा रहेको समाचारहरु बाहिरिएको थियो । निराशजनक प्रदर्शनले हरेक खेलहरु उनको लागि टाउको दुखाईको विषय बन्दै आएको थियो । अन्तर्राष्ट्रिय विश्रामपछिको पहिलो खेलमै खराव नतिजा आत्मसात गरेपछि उनीमाथि थप दवाव सिर्जना भएको थियो ।

म्यानचेस्टर युनाइटेडकै ४८ वर्षीय पुर्व नर्वेजियन फरवार्ड सोल्सायर सन् २०१८ डिसेम्वरमा युनाइटेडको मुख्य प्रशिक्षक बनेका थिए । त्यसयता, उनको प्रशिक्षणमा युनाइटेडले १६८ खेल खेल्दा ९१ जित, ३७ बराबरी र ४० हारको नतिजा निकालेको छ । युनाइटेड आएपछि उनले टोलीमा परिवर्तन गरेपनि कुनै उपाधि जित्न सकेनन् ।