एजेन्सी – इंग्लिस प्रिमियर लिग अन्तर्गत शनिबार भएको लन्डन डर्बीमा वेस्ट ह्याम युनाइटेडले दुई पटक पछि परेको अवस्थालाई उल्टाउँदै अंक तालिकाको शीर्षस्थानमा रहेको चेल्सीलाई पराजित गरेको छ ।

घरेलु मैदानमा वेस्ट ह्यामले अन्तिम समयमा गोल गर्दै ३-२ को रोमान्चक जित दर्ता गर्यो । चेल्सीले खेलको २८ औं मिनेटमा थियागो सिल्भाको गोलमा अग्रता लिएको थियो । मेसन माउन्टको कर्नरमा सिल्भाले हेडरमार्फत गोल गरेका थिए । तर वेस्ट ह्यामले ४० औं मिनेटमा पेनाल्टीमार्फत बराबरीको अवसर पायो ।

जर्जिन्होको ब्याक पासलाई जेरड बोवेनले भेटेपछि उनलाई रोक्ने क्रममा गोलरक्षक एडुआर्ड मेन्डीले फल गरेपछि घरेलु टोलीले पेनाल्टी पाएको थियो । म्यानुएल लान्जिनीले पेनाल्टीमा गोल गर्दै खेल बराबरीमा ल्याए । तर पहिलो हाफको एक मिनेट समय बाँकी रहँदा चेल्सीले पुन: अग्रता लियो । हाकिम जिएचको क्रसमा माउन्टले भलीमा गोल गरेका थिए ।

दोस्रो हाफको ५६ औं मिनेटमा वेस्ट ह्यामले खेल बराबरीमा ल्यायो । भ्लादिमिर कौफलको पासमा बोवेनले पेनाल्टी क्षेत्रको ठिक बाहिरबाट गोल गरे । खेलको ३ मिनेट बाँकी रहँदा अर्थर मासुआकुले उत्कृष्ट गोल गर्दै टोलीको जित पक्का गरे । बायाँ विंगबाट उनले गरेको लामो प्रहारमा गोलरक्षक मेन्डी बिट भएका थिए ।

यस जितसँगै वेस्ट ह्यामले अंक तालिकामा चेल्सीसँगको दुरी ६ अंकमा झारेको छ । टोली १५ खेलमा २८ अंकसहित चौथो स्थानमा उक्लिएको छ । चेल्सीको १४ खेलमा ३३ अंक छ ।