एजेन्सी – इटालियन क्लब इन्टर मिलानलाई पराजित गर्दै स्पेनिस क्लब रियल म्याड्रिड समूह विजेता बन्दै युइएफए च्याम्पियन्स लिगको नकआउट चरणमा पुग्न सफल भएको छ ।

घरेलु मैदानमा टोनी क्रुस र मार्काे एसेन्सियोले गोल गरेपछि रियलले २–० को सहज जित निकाल्दै समूह विजेता बन्न सफल भएको हो । दुवै टोलीले समूह चरण पार गरेपनि समूह विजेताको छिनोफानो हुने खेलमा रियलले बाजी मारेको हो ।

सान्टियागो बर्नबेउमा मंगलबार राति भएको खेलको १७औं मिनेटमा मिडफिल्डर टोनी क्रुसको गोलबाट रियलले अग्रता लिन सफल भएको थियो । उनले रोड्रिगोको पासलाई सदुपयोग गरेका थिए ।

६४औं मिनेटमा निकोलो बरेल्ला सिधै रातो कार्ड खाँदै मैदानबाट बाहिरिएपछि इन्टर समस्यामा परेको थियो । इडर मिलिसाओलाई मुक्का हानेपछि रेफ्रीले उनलाई सिधै रातो कार्ड देखाएका थिए । त्यसअघि मिलिसाओले उनलाई अनावश्यक फउल गर्दा उनले पनि पहेलो कार्ड पाएका थिए ।

७९औं मिनेटमा सव्सिच्युट विंगर मार्काे एसेन्सियोले मैदान प्रवेश गरेको पहिलो मिनेटमा गोल गर्दै घरेलु टोली रियलको जित पक्का गरे । उनी ७८औं मिनेटमा रोड्रिगोको स्थानमा मैदान प्रवेश गरेका थिए ।

यो जितसँगै समुह ‘डी’ मा रियलले ६ खेलबाट १५ अंक जोड्यो । रियलले समूहमा एफसी सेरिफसँग मात्रै हार बेहोरेको थियो । पराजित इन्टर १० अंक जोडेर दोस्रो स्थानमा रह्यो । सेरिफ ७ अंक जोडेर तेस्रो स्थानमा रहँदा साख्तर डोनेस्क २ अंकसहित पुछारमा रह्यो ।

मंगलबार राति नै भएको यही समुहको अर्काे खेलमा युक्रेनी क्लब साख्तर डोनेस्क र मोल्दोभाको एफसी सेरिफले १–१ गोलको बराबरी खेल्दै अंक बाँडेका छन् ।