एजेन्सी – जर्मन बुन्डेसलिगा अन्तर्गत शनिबारको खेलमा साविक विजेता बायर्न म्युनिखले वल्फ्सबर्गलाई पराजित गरेको छ । घरेलु मैदान आलिआन्ज एरिनामा बायर्नले ४-० को जित हासिल गरेको हो ।

खेलको सातौं मिनेटमा नै बायर्नले थोमस मुलरको गोलमा अग्रता लियो । लेरोय सानेको प्रहारलाई गोलरक्षक कोइन कास्टिल्सले विफल पारेपनि रिबाउन्डमा मुलरले सहजै गोल गरे । पहिलो हाफमा नै पाहुना टोलीले बराबरी गर्ने अवसर पाएपनि वोउट वेघर्स्टले म्यानुएल नोएरलाई वन भर्सेस वनको अवस्थामा बिट गर्न सकेनन् ।

दोस्रो हाफको ५७ औं मिनेटमा बायर्नले अग्रता दोब्बर पार्यो । छोटो कर्नर मुभमा मुलरको क्रसलाई डायोट उपामेकानोले गोल गर्दै अग्रता दोब्बर पारे । त्यसको दुई मिनेटमा नै बायर्नले तेस्रो गोल गर्दै सहज जिततर्फ उन्मुख देखियो । सानेले सानदार गोल गर्दै घरेलु टोलीलाई बलियो स्थितिमा पुर्याएका थिए ।

खेलको ३ मिनेट समय बाँकी रहँदा रोबर्ट लेवान्डोस्कीले चौथो गोल थपे । उनले मुसियालाको चलाखीपूर्ण पासलाई गोलमा परिणत गरे । उनको सन् २०२१ मा यो ४३ औं लिग गोल थियो ।

यस जितसँगै बायर्नले शीर्षस्थानमा अग्रता ७ अंकको बनाएको छ । बायर्नले १७ खेलमा ४३ अंक जोडेको छ । दोस्रो स्थानको बोरुसिया डर्टमुन्डले १६ खेलमा ३६ अंक बनाएको छ । डर्टमुन्डले आज हर्था बर्लिनसँग खेल्दैछ ।