एजेन्सी – जर्मन क्लब बोरुसिया डर्टमुन्डका नर्वेजियन युवा स्टार एर्लिङ ब्राउट हालान्डको रिलिज क्लज तय गरिएको छ । २१ वर्षीय युवा स्टार हालान्डको सम्भावित ट्रान्सफरलाई ध्यानमा राख्दै उनको बजार मुल्य तय गरिएको हो ।

उनको रिलिज क्लब ७५ मिलियन युरो तय गरिएको छ । केही समयदेखि नै हालान्डको मुल्यलाई लिएर अड्कलवाजी भइरहेको छ । शीर्ष क्लबहरुले उनलाई अनुबन्ध गर्ने योजना बनाइरहेका छन् ।

सन् २०२० को जनवरीमा क्लबमा आबद्ध भएदेखि हालान्डले डर्टमुन्डका लागि ७४ खेलमा ७६ गोल गरिसकेका छन् । हालान्डले यो सिजनको अन्त्यसँगै अर्काे समरमा क्लब छाड्ने आँकलन गरिएको छ । क्लब छाड्ने सम्भावना रहेका कारण पनि उनको रिलिज क्लज तोकिएको हो ।

हालान्डलाई अनुबन्ध गर्न जर्मन क्लब बायर्न म्युनिखसँगै स्पेनिस क्लब रियल म्याड्रिड, बार्सिलोना, इंग्लिस क्लब म्यानचेस्टर सिटी र म्यानचेस्टर जोडिएको छ । उनको एजेन्ट मिना राइओलाले यि मध्ये एक क्लबमा हालान्ड अनुबनध हुने बताइएको छ ।

‘हालान्ड युरोपका ठुला क्लबसँग जोडिएका छन् । रियल म्याड्रिड हालान्डको अनुबन्धमा अघि छ ।’ डर्टमुन्डका सिइओ हान्स जोआचिम वाट्जकेले भने, ‘तपाई जहाँ जानुहुन्छ । त्यहाँ हालान्डको कुरा हुन्छ । मलाई यतिमात्र थाहा छ कि रियलले उनलाई धेरै चासो राखेको छ । म अन्य २५ टोलीको नाम बताउन सक्छु । तर उनी कहाँ जान्छन् । त्यो भन्न सकिदैन ।

जर्मन पत्रिका विल्डका अनुसार म्यानचेस्टर युनाइटेड र सिटीसँगै रियल म्याड्रिडले उनको रिलिज क्लज तिर्न सक्नेछ । बार्सिलोनाले पनि हालान्डलाई चाहेको छ । तर, उनलाई अनुबन्ध गर्न संघर्ष गर्नुपर्नेछ । बायर्नले पनि हालान्डलाई अनुबन्ध गर्न सक्नेछ । तर, तत्कालै बायर्नको योजनामा हालान्ड छैन ।