एजेन्सी – ब्राजिलियन मिडफिल्डर लुकास मोउराले एक गोलतथा दुई असिस्ट दिएपछि इंग्लिस प्रिमियर लिगमा टोटेनहम हटस्परले क्रिस्टल प्यालेसलाई पराजित गरेको छ ।

टोटेनहमले १० खेलाडीमा समेटिएको प्यालेसलाई घरेलु मैदानमा ३–० ले पराजित गरेको हो । टोटेनहम हटस्पर स्टेडियममा आइतबार राति भएको खेलमा घरेलु टोलीको जितमा ह्यारी केने, लुकास मोउरा र ह्युङ मिन सनले गोल गरे ।

खेलको ३२औं मिनेटमा केनको गोलबाट टोटेनहमले सुरुवाती अग्रता लिएको थियो । उनले लुकास मोउराको पासमा गोल गरेका थिए । त्यसको दुई मिनेटपछि ३४औं मिनेटमा लुकास मोउराले गोल गर्दै टोटेनहमको अग्रता दोब्बर पारे । उनले इमर्सन रोयलको पासलाई सदुपयोग गरेका थिए ।

३७औं मिनेटमा वेलफ्रेड जाँहा दोहोरो पहेँलो कार्ड खाँदै मैदानबाट बाहिरिएपछि क्रिस्टल प्यालेस दवावमा आएको थियो । ७४औं मिनेटमा ह्युङ मिन सनले गोल गर्दै टोटेनहमको जित पक्का गरे । उनले लुकास मोउराको पासलाई सदुपयोग गरेका थिए ।

जितपछि टोटेनहम १६ खेलबाट २९ अंक जोडेर पाँचौ स्थानमा उक्लिएको छ । टोटेनहम तीन खेल बढी खेलेको आर्सनलसँग ६ अंकले पछि छ । पराजित क्रिस्टल प्यालेस १८ खेलबाट २० अंक जोडेर १२औं स्थानमा रहेको छ ।

अर्काे खेलमा ब्राइटनले ब्रेन्टफर्डलाई २–० ले पराजित गरेको छ । ब्राइटनको जितमा लियान्द्रो ट्रोससार्ड र निल मोउपेले गोल गरे । जितसँगै ब्राइटन १७ खेलबाट २३ अंक जोडेर नवौं स्थानमा उक्लिएको छ । पराजित ब्रेन्टफर्ड २० अंक जोडेर १३औं स्थानमा रहेको छ ।