एजेन्सी – इटालियन राष्ट्रिय टोली तथा युभेन्टसका दिग्गज गोलरक्षक जियानलुइजी बुफोनले पोर्चुगिज फरवार्ड क्रिस्टियानो रोनाल्डोको आगमनपछि क्लबको एकवद्ध हुने डीएनए हराएको अभिव्यक्ति दिएका छन् ।

सन् २०१८ मा इटालियन च्याम्पियन युभेन्टस पुगेका रोनाल्डोले त्यहाँ तीन वर्ष बिताएका थिए । युभेन्टस बसाइका क्रममा रोनाल्डोले दुई सिजन इटालियन लिग जितेपनि च्याम्पियन्स लिगमा भने क्वाटरफाइनल चरण समेत पार गर्न सकेनन् । इटालियन क्लबका लागि १ सय ३५ खेलमा १ सय १ गोल गरेका रोनाल्डो यसै सिजनको सुरुवातमा पूर्व क्लब म्यानचेस्टर युनाइटेड फर्केका थिए ।

झन्डै २ दशक युभेन्टसमा बिताएका गोलरक्षक बुफोन पनि यसै सिजन पूर्व क्लब पार्मा फर्केका छन् । उनी त्यसबीचमा एक सिजन भने फ्रान्सको पेरिस सेन्ट जर्मेन पुगेका थिए । बुफोनले युभेन्टसबाट १० पटक लिग उपाधि जितेका थिए । बुफोनले युभेन्टसबारे अमेरिकी टेलिभिजन टियुडीएनमा अन्तर्वार्ता दिएका थिए ।

‘रोनाल्डो आएकै वर्ष युभेन्टसले च्याम्पियन्स लिग जित्न सक्थ्यो । म त्यसबेला पेरिसमा थिएँ । मलाई थाहा छैन त्यसबेला क्लबमा के भयो,’ बुफोनले सुनाए ।

‘मैले युभेन्टस फर्केपछि दुई वर्ष रोनाल्डोसँग बिताएँ । हामीले राम्रो पनि गर्यौं । तर उनी आएपछि युभेन्टसमा टिमको रुपमा एक बन्ने डीएनए भने गुमाएको महसुस गरें,’ उनले भने ।

‘हामीले सन् २०१७ मा च्याम्पियन्स लिगको फाइनल यात्रा तय गर्यौं । त्यसबेला टोली अनुभवले भरिपूर्ण थियो र एक भएर खेलेका थियौं । टोलीमा स्थान बनाउनका लागि आन्तरिक प्रतिस्पर्धा थियो । तर रोनाल्डो आएपछि त्यो हरायो ।’

रोनाल्डो र बुफोन दुवैले गत सिजन क्लबलाई अन्तिम दिनमा च्याम्पियन्स लिगका लागि छनोट गराएका थिए । दुवैले क्लब छाडेपछि अहिले लिगमा युभेन्टस पाँचौ स्थानमा छ । शीर्षस्थानको इन्टरभन्दा टोली १२ अंकले पछाडी छ ।