एजेन्सी – इंग्लिस प्रिमियर लिगमा आज (आइतबार) राति लन्डन क्लब चेल्सी घरेल मैदानमा लिभरपुलसँग खेल्दैछ । खेल चेल्सीको मैदानमा नेपाली समयअनुसार राति १०:१५ बजे हुनेछ ।

प्रशिक्षक थोमस टुचेलले बेल्जियन फरवार्ड रोमेलु लुकाकुलाई लिभरपुलविरुद्ध खेलका लागि टोलीमा नराख्ने भएका छन् । २८ वर्षीय फरवार्ड पछिल्लो साता एक अन्तर्वार्ताका क्रममा प्रशिक्षक टुचेलको रणनीति र चेल्सी भविष्यबारे दिएको अभिव्यक्तिका कारण चर्चामा छन् । प्रशिक्षक टुचेलले लुकाकुले अनावश्यक हल्ला गरेको भन्दै टीप्पणी गरेका थिए ।

शीर्ष दुईको होडमा रहेका चेल्सी र लिभरपुल बीचको खेल प्रतिस्पर्धात्मक र रोमाञ्चक हुने अपेक्षा गरिएको छ । घरेलु मैदानमा हुने खेलमा चेल्सी लिभरपुललाई हराउँदै शीर्षस्थाको म्यानचेस्टर सिटीसँगको अंक दुरी छोट्याउँदै शीर्ष दुईमा आफ्नो स्थानलाई मजवुत बनाउन चाहन्छ ।

चेल्सी २० खेलबाट ४२ अंक जोडेर दोस्रो स्थानमा रहेको छ । लिभरपुलसँग पराजित भए चेल्सी तेस्रो स्थानमा झर्नेछ । बराबरीले दोस्रो स्थानमा नै रहनेछ ।

टोलीसँग काई हाभर्टज, मासन माउन्ट, एङ्गोलो कान्टे, जर्गिन्हो, कलुम हड्सन ओडोई, एन्टेनियो रुडिगर, सिजर एज्पिलिक्वेटा र गोलरक्षक इडुआर्ड मेन्डी रहेका छन् । यसबाहेक टोलीसँग माटियो कोभासिस, क्रिस्टियन पुलिसिस, रिस जेम्स, मार्काेस अलन्सो र ट्रिभोअ चलोवाह रहेका छन् ।

यता, लिभरपुल पनि चेल्सीलाई उसकै मैदानमा हराउँदै दोस्रो स्थानमा उक्लने योजनामा हुनेछ । लिभरपुलले चेल्सीलाई हराउन सके चेल्सीलाई पछि पार्दै दोस्रो स्थानमा उक्लनेछ । लिभरपुलको १९ खेलबाट ४१ अंक रहेको छ ।

टोलीसँग मोहम्मद सलाह, साडियो माने, डिएगो जोटा, फाविन्हो, जोर्डन हेन्डरसन, एलेक्स अक्सलेड चेम्वरलेन, भर्जिल भान डाइक, जोएल मटिप एलेक्सान्डर अर्नाेल्ड र गोलरक्षक एलिसन बेकर रहेका छन् ।

यि दुई टोलीको पछिल्लो ३१ खेलको नतिजामा लिभरपुलले ११ खेल आफ्नो पक्षमा पारेको छ । १० खेल चेल्सीले जित्दा १० खेल बराबरीमा सकिएको छ । यि दुई टोलीको पछिल्लो तीन खेलको नतिजामा दुवै टोलीले समान १ जित, बराबरी र हारको नतिजा निकालेको छ । सोही कारण पनि खेल रोमाञ्चक र प्रतिस्पर्धात्मक हुने अपेक्षा गरिएको छ ।