एजेन्सी – विश्व फुटबलमा सबैभन्दा धेरै उपाधि जितेका ब्राजिलियन भेट्रान डिफेन्डर ड्यानी अल्भेसको क्याटलान क्लब बार्सिलोनमा दोस्रो इनिङ्स शुरु भएको छ ।

३ जनवरीमा ला लिगामा दर्ता भएपछि कोपा डेल रेमा तेस्रो श्रेणीको लिनारेस डिपोर्टिभोविरुद्ध खेल्दै आल्भेसले बार्सिलोनामा दोस्रोपटक डेब्यु गरेका हुन् । उक्त खेलमा बार्सिलोनाले २–१ को पूनरागमन जित निकाल्दै कोपा डेल रेको अन्तिम १६ मा पुग्न सफल भएको हो । उक्त खेलमा पूरै ९० मिनेट मैदानमा बिताएका ड्यानी आल्भेसले पहिलो खेलमै उच्च प्रदर्शन गरेका थिए ।

सन् २०१६ मा क्याप नोउ छोडेका ३८ वर्षीय आल्भेसलाई बार्सिलोनाले नोभेम्बरमा फ्रि ट्रान्सफरमा क्लबमा फर्काएको थियो । बार्सिलोना फर्कनुअघि आल्भेसले ब्राजिली क्लब साओ पाउलो, पिएसजी र युभेन्ट्सबाट खेलेका थिए । त्यसअघि उनी २००८–०९ को सिजनमा सेभियाबाट बार्सिलोना आएका थिए ।

यसअघि अर्जेन्टिनी लिजेन्ड खेलाडी डिएगो म्याराडोनाको स्मृतिमा आयोजित म्याराडोना कपमा उनले बार्सिलोनाका लागि दोस्रो पटक डेब्यु गरेका थिए । तर उनी त्यतिबेला ला लिगामा दर्ता भएको थिएन । डिसेम्बरमा भएको खेलमा बार्सिलोना अर्जेन्टिनी क्लब बोका जुनियर्ससँग पेनाल्टीमा ४–२ गोलले पराजित बनेको थियो ।

सन् २००६ देखि ब्राजिलको राष्ट्रिय टोलीमा रहेका उनले ११९ खेलबाट ८ अन्तर्राष्ट्रिय गोल गरेका छन् ।