एजेन्सी – क्याटलान क्लब बार्सिलोनाका ब्राजिली मिडफिल्डर फिलिपे कौटिन्हो इंग्लिस क्लब एस्टन भिल्लामा अनुबन्धित भएका छन् । कौटिन्हो लोनमा इंग्लिस क्लबमा पुगेका हुन् ।

सन् २०१८ मा इंग्लिस क्लब लिभरपुलबाट १६० मिलियन युरोमा बार्सिलोना आएपछि कौटिन्होले दोस्रोपटक बार्सिलोना छाडेका हुन् । २९ वर्षीय कौटिन्होले सन् २०१९–२० को सिजनमा जर्मन क्लब बायर्न म्युनिखबाट लोनमा खेलेका थिए । उनी २०१८ पछि प्रिमियर लिगमा फर्किएका हुन् ।

एस्टन भिल्ला र बार्सिलोनाबीच कौटिन्होको लागि यो सिजनको लागि सम्झौता भएको भिल्लाले जारी गरेको विज्ञप्तिमा उल्लेख छ । अनुबन्ध पक्का भएसँगै कौटिन्हो मेडिकललगायत अन्य प्रक्रिया पूरा गर्नका लागि ४८ घन्टाभित्र बर्मिङघम पुग्नेछन् ।

जेरार्डसँग पूनर्मिलन

बार्सिलोना र भिल्लाबीच सम्झौता भएसँगै कौटिन्हो र प्रशिक्षक स्टेभन जेरार्डबीच पुनर्मिलन हुने भएको छ । जेरार्ड र कौटिन्होले दुई वर्ष एनफिल्डमा सँगै खेलेका थिए । ब्राजिलका लागि ६३ क्याप जितेका कौटिन्होले लिभरपुलमा अविश्वसनीय प्रदर्शन गरेपछि उनीलाई युरोपका ठुला क्लबले नजर लगाउँदा बार्सिलोनामा अनुबन्धित भएका थिए । तर, उनले बार्सिलोनामा सोचुअनुरुपको प्रदर्शन गर्न सकेनन् ।

‘म बुझ्न सक्छु किन धेरै समर्थकहरु उनका बारेमा बोलिरहेका छन् । मलाई लाग्दैन कि तपाई एक जादुगरको उपनाम पाउनुहुन्छ । यदि तपाई एक विशेष फुटबलर हुनुहुन्न र त्यसैले उहाँ त्यस्तो व्यक्ति हुनुहुन्छ जसलाई मेरो अविश्वसनीय मात्रामा सम्मान छ । तर म कुनै पनि अनुमान गर्न चाहन्न किनकि उनी बार्सिलोनाका हुन् ।’ भिल्लाका प्रशिक्षक जेरार्डले भने ।

कौटिन्होले यो सिजन बार्सिलोनाका लागि २६ खेलमध्ये पाँच खेलमा मात्रै सुरुवाती रोजाईमा अवसर पाएका थिए । कौटिन्हो नियमित पहिलो रोजाईमा खेल्दै यसै वर्ष कतारमा आयोजना हुने विश्वकपमा ब्राजिलको टोलीमा स्थान बनाउन चहान्छ । यो सिजन खराव सुरुवात गरेको भिल्ला जेरार्डको आगमनसँगै लयमा फर्किएको छ । भिल्ला १३औं स्थानमा रहेको छ ।