एजेन्सी – अफ्रिका कप अफ नेसन्समा रेफ्रीले निर्धारित समयको खेल नसकिदै दुईपटक अन्तिम ह्वीसिल बजाएका छन् । ट्युनिसियालाई मालीले १–० ले पराजित गरेको खेलमा रेफ्री ज्यानी सिकज्वेले दुईपटक खेल सकिएको ह्वीसिल बजाएका थिए ।

रेफ्री ज्यानीले ८५औं मिनेटमा अन्तिम सिटी बजाए, खेल पुन सुचारु भएपनि उनले ८९ मिनेट ४३ सेकेन्डमा अन्तिम सिट्टी फुके । खेल सकिन बाँकी छँदै अन्तिम सिटी बजेपछि एक गोलले पछि रहेको ट्युनिसियाको बेञ्च निकै क्रोधित बनेको थियो । ट्युनिसियाका प्रशिक्षक मोन्डर केबाइरले जाम्बियाका रेफ्री ज्यानीको हात समातेर आफ्नो घडीमा समय रहेको औंल्याएका थिए ।

केबाइरले लाइन्समेनलाई रेफ्रीले समय बाँकी रहँदै सिट्टी फुकिएको गुनासो गरेका थिए । त्यसपछि उनलाई सुरक्षा घेरामा राख्दै ड्रेसिङ रुमतर्फ लगिएको थियो । मालीका प्रशिक्षक मोहम्मद मगासौबाको खेलपछिको पत्रकार सम्मेलनपछि अबरुद्ध भएको थियो । त्यसपछि अफ्रिकी फुटबल संघका अधिकारीहरुबीचको छलफलपछि अन्तिम तीन मिनेटमा खेल भएको थियो ।

तर अन्तिम तीन मिनेट नाटकीय ट्वीस्टमा ट्युनिसियाले बाहिर आउन र अन्तिम तीन मिनेट खेल्न अस्वीकार गरिरहेको देखिएको थियो । रेफ्री सिकज्वे र मालीले उनीहरुललाई पर्खिरहेका थिए । रेफ्री सिकज्वेले त्यसपछि सिटी बजाए र खेल सकिएको निर्देशन दिए ।

सिकज्वेले पाँच मिनेट पानीको ब्रेकको लागि खेल रोक्दा त्रुटि भएको मानिएको छ । त्यो गल्तीले उनको घडीमा ९० मिनेट चलेको देख्यो । जवकि घडीमा ८५औ मिनेट मात्र पुगेको थियो । थप समय खेलाउँदा सम्भावित अर्काे भ्रम निम्तने समस्या सम्भावना पनि रहेको थियो ।

उक्त खेलमा माली १–० ले विजयी हुन सफल भयो । मालीका लागि इब्राहिमा कोनाले ४८औं मिनेटमा पेनाल्टीमा गरेको गोल नै निर्णायक बन्यो ।
७७औं मिनेटमा ट्युनिसियाका वाहवि खाज्री पेनाल्टीमा चुकेका थिए । ८७औं मिनेटमा इल विलाल टाउरे सिधै रातो कार्ड खाँदै मैदानबाट बाहिरिदा माली १० खेलाडीमा समेटिन पुगेको थियो ।

यो जितसँगै मालीले समूह ‘एफ’ मा ३ अंक जोडेको छ । ट्युनिसिया अंकविहीन छ ।