एजेन्सी – फिफा विश्वकप कतार २०२२ मा स्थान पक्का गरिसकेको ब्राजिलले सानदार जित निकालेको छ । घरेलु मैदानमा पाराग्वेलाई ४–० को फराकिलो अन्तरले पराजित गर्दै ब्राजिल दक्षिण अमेरिकी छनोटमा अपराजित रहन सफल भएको हो ।

ब्राजिलको सानदार जितमा राफिन्हा, फिलिपे कौटिन्हो, एन्टोनी र रोड्रिगोले समान एक गोल गरे । बेलो होरिजेन्टे मिनास ब्राजिलमा बुधबार बिहान भएको खेलको तेस्रो मिनेटमा नै राफिन्हाले गोल गरेपनि अफसाइड ठहरिदा गोलले मान्यता पाएन ।

१७औं मिनेटमा भिनिसियस जुनियरको पासमा म्याथिअस कुन्हाको प्रहार क्रसबारमा लाग्दै बाहिरिदा ब्राजिल अग्रता लिनबाट चुक्यो । २८औं मिनेटमा राफिन्हाको गोलबाट ब्राजिलले सुरुवाती अग्रता लिन सफल भयो । उनले डिफेन्डर मार्किन्हसको लामो पासलाई नियन्त्रणमा लिदै गोल गर्न सफल भएका थिए ।

पहिलो हाफको इन्ज्युरी समयको थप गरिएको तेस्रो मिनेटमा फिलिपे कौटिन्होको कर्ल फ्रिकिकमा थियागो सिल्भा चुके । ४८औं मिनेटमा भिनिसियस जुनियरको १८ यार्ड टाढाको क्रस पासमा राफिन्हाको भली प्रहारले गोलरक्षकलाई बिट गरेपनि पास्ट नजिकैबाट थोरै बाहिरियो ।

६२औं मिनेटमा फिलिपे कौटिन्होले गोल गर्दै ब्राजिलको अग्रता दोब्बर पारे । मार्किन्हसको पासमा कौटिन्होले सुन्दर गोल गर्न सफल भए । ८६औं मिनेटमा सब्सिच्युट फरवार्ड एन्टोनीले गोल गर्दै ब्राजिललाई सहज जिततर्फ अघि बढाए ।

६१औं मिनेटमा भिनिसियस जुनियरको स्थानमा मैदान छिरेका एभर्टन रिवेइरोको पासमा गोल गर्न सफल भएका थिए । त्यसको दुई मिनेटमा पछि अर्काे सब्सिच्युट रोड्रिगोले गोल गर्दै ब्राजिलको फराकिलो जित पक्का गरे । ८२औं मिनेटमा राफिन्हाको स्थानमा मैदान छिरेका रोड्रिगोले ८८औं मिनेटमा ब्रुनो गुइमारेसको पासमा गाृल गर्न सफल भएका थिए ।

जितसँगै अपराजित रहेको ब्राजिल १५ खेलबाट ३९ अंक जोडेर शीर्षस्थानमा यथावत रहेको छ । ब्राजिलले १२ जित र ३ बराबरीको नतिजा निकालेको छ । पराजित पाराग्वे १३ अंक जोडेर नवौं स्थानमा रहेको छ ।