एजेन्सी – क्याटलान क्लब बार्सिलोनाले गावोन तथा इंग्लिस क्लब आर्सनलका फरवार्ड पिएरे एमरिक औवामियाङलाई अनुबन्ध गरेको छ ।

बार्सिलोनाले गावोनका ३२ वर्षीय आर्सनलका पुर्व कप्तान तथा फरवार्डलाई फ्रि ट्रान्सफरमार्फत सन् २०२५ सम्मको लागि अनुबन्ध गर्न सफल भएको हो । त्यहाँ २०२३ मा अलग हुने विकल्प राखिदा १ सय मिलियन युरो रिलिज क्लज राखिएको छ । डिसेम्बरमा अनुशासनको कारबाहीमा परेपछि औवामियाङले आर्सनलका लागि खेलेका थिएनन् ।

बार्सिलोनाले औवामियाङको आगमन पुष्टि गर्नुभन्दा केही मिनेट अघि क्लबले उनलाई ला लिगामा दर्ता गर्न सक्षम भयो । औबामियाङले ३१ जनवरीमा बार्सिलोनामा अवतरण गरेका थिए ।

पछि आर्सनलले आधिकारिक रुपमा स्थानान्तरणको लागि फुकुवा गरिदिएको थियो । त्यसपछि उनको मेडिकललगायत अन्य पक्रिया सुरु भएको थियो । बार्सिलोनाले आधिकारिक रुपमा उनलाई अनुबन्ध गरेको घोषणा गरेका थिएनन् । उनी मंगलबार देखि नै क्लबको प्रशिक्षणमा सामेल भइसकेका थिए ।

बार्सिलोनाले जनवरीमा भित्र्याएको औवामियाङ तेस्रो फरवार्ड हो । यसअघि बार्सिलोनाले फेरान टोरेस र एडमा ट्राओरेलाई अनुबन्ध गर्न सफल भएको थियो । अब पहिलो रोजाईमा पर्न अन्सु फाती, मार्टिन ब्रेथवेट, मेम्फिस डिपाए, लुक डि जोङ, एब्डे इज्जालजोउली र फेरान जुट्ग्लाबीच प्रतिस्पर्धा हुनेछ । डेम्वेले अर्काे फरवार्ड हो जुन बार्सिलोनाको हातमा छ । उनी बार्सिलोनामै बस्ने या बाहिरिने दुवैको हातमा छ ।

औवामियाङले २००८ देखि २०१३ सम्म फ्रान्सको विभिन्न क्लबमा खेलेका थिए । त्यसपछि २०१३ देखि २०१८ सम्म जर्मन क्लब बोरुसिया डर्टमुन्डबाट खेल्दै सबैको ध्यान खिच्न सफल भएका थिए । त्यसपछि उनी लन्डन क्लब आर्सनल पुगेका थिए । औवामियाङले आर्सनलमा २०१८ देखि २०२२ सम्म १ सय ६३ खेलमा ९२ गोल गरेका छन् । यो सिजन औवामियाङले १५ खेलमा ७ गोल गरेका थिए ।

फ्रान्सको यु–२१ टोलीबाट खेलिसकेका औवामियाङले त्यसपछि गावोन रोजेका थिए । २००९ देखि गावोनको सिनियर टोलीमा रहेका उनले ७२ खेलमा ३० अन्तर्राष्ट्रिय गोल गरेका छन् ।