एजेन्सी – जर्मन बुन्डेसलिगाको शीर्षस्थानमा रहेको बायर्न म्युनिखले रोमाञ्चक जित निकालेको छ । बायर्नले घरेलु मैदानमा आरबी लाइप्जिगलाई ३–२ ले हराएको हो ।

बायर्नको जितमा थोमस मुलर र रोबर्ट लेवान्डोस्कीले गोल गर्दा एक गोल उपहार पाएको थियो । लाइप्जिगका आन्द्र सिल्भा र क्रिस्टोफोर एनकुन्कुले गोल गरेपनि आत्मघाती गोल गर्न पुग्दा पराजित हुन पुग्यो ।

एलिएन्ज एरिना म्युनिखमा शनिबार राति भएको खेलको १२औं मिनेटमा थोमस मुलरको गोलबाट बायर्नले सुरुवाती अग्रता लिएको थियो । रोबर्ट लेवान्डोस्कीको प्रहारलाई गोलरक्षक गुलाक्सीले बचाएपनि रिवाउन्डका मुलरले सहजै फिनिस गरेका थिए ।

२७औं मिनेटमा आन्द्र सिल्भाले गोल गर्दै खेललाई १–१ गोलको बराबरीमा ल्याए । उनले कोनराड लेइमेरको पासमा कमजोर डिफेन्सको फाइदा उठाउँदै गोल गरेका थिए । ३६औं मिनेटमा मुलरले गोल गरेपनि भिएआरबाट मान्यता पाएन ।

४४औं मिनेटमा लेवान्डोस्कीले गोल गर्दै बायर्नलाई २–१ को अग्रता दिलाए । किङ्सले कोमानको क्रसमा लेवान्डोस्कीले हेडमार्फत सुन्दर गोल गरेका थिए । ५३औं मिनेटमा क्रिस्टोफोर एनकुन्कुले गोल गर्दै खेललाई २–२ गोलको बराबरीमा ल्याए । लेइमेरको पासमा एनकुन्कुले अफसाइड बिट ट्याप गर्दै वान भर्सेस वानको अवस्थामा कुनै गल्ती गरेनन् ।

५८औं मिनेटमा जोस्को भार्डीओलले आत्मघाती गोल गरेपछि बायर्न खेलमा ३–२ ले अघि बढ्यो । सर्ज जिनाब्रीको क्रसलाई बचाउने क्रममा बलले आफ्नै पोस्टको दिशा लिदा गोलरक्षक गुलाक्सी पनि झुक्किन पुगे । त्यसपछि थप गोल निस्कन नसक्दा बायर्न विजयी हुन सफल भयो ।

यो जितसँगै बायर्नले यो सिजनको पनि उपाधि जित्ने सम्भावना बलियो बनाएको छ । शीर्षस्थानमा रहेको बायर्नको २१ खेलबाट ५२ अंक छ । बायर्नले एक खेल कम खेलेको दोस्रो स्थानमा रहेको बोरुसिया डर्टमुन्डलाई ९ अंकले पछि पारेको छ । पराजित लाइप्जिग ३१ अंक जोडेर सातौ स्थानमा रहेको छ ।