एजेन्सी – माउरोसियो पोचेटिनोले अर्को सिजन पेरिस सेन्ट जर्मेन (पिएसजी) छाड्न र उनको ठाँउ जिनेदिन जिदानले लिने अपेक्षा गरिएको छ । यदि त्यस्तो भएमा जिदानले क्रिस्टियानो रोनाल्डोलाई पनि पिएसजी आबद्ध गराउने सम्भावना रहेको बताइएको छ ।

जिदान र रोनाल्डो दुवै रियल म्याड्रिडमा हुँदा उनीहरुबीच राम्रो सम्बन्ध रहेको थियो । उनीहरुले सँगै रियलमा लगातार तीन पटक च्याम्पियन्स लिग उपाधि जितेका थिए । सञ्चारमाध्यमका अनुसार जिदान अर्को सिजन पिएसजी जानेछन् । त्यो अवस्थामा उनको पहिलो अनुरोध रोनाल्डोलाई क्लबमा आबद्ध गराउनुहुनेछ । युभेन्ट्स छाडेर रोनाल्डो सिजनको सुरुवातमा म्यानचेस्टर युनाइटेड पुगेका थिए ।

पिएसजीले पोर्चुगलका अन्तर्राष्ट्रियलाई लिनका लागि प्रयास गरेपनि सफल हुन सकेको थिएन । इंग्ल्यान्डका सञ्चारमाध्यमका अनुसार अहिले रोनाल्डो पनि लियोनल मेस्सी र नेयमारसँगै पिएसजीमा खेल्न इच्छुक छन् ।

पोचेटिनोको युनाइटेड जाने सम्भावना

अर्जेन्टिनी प्रशिक्षक पोचेटिनो भने अर्को सिजन युनाइटेड जाने सम्भावना छ । युनाइटेडले राल्फ रागनिकलाई अन्तरिक प्रशिक्षकको रुपमा नियुक्त गरेको थियो । युनाइटेडको खराब प्रदर्शनको सिलसिला नरोकिएकाले रागनिकलाई प्रशिक्षकका रुपमा निरन्तरता दिने सम्भावना कम रहेको छ । सर एलेक्स फर्गुसनको रोजाईमा पनि पोचेटिनो रहेको बताइएको छ ।