काठमाडौं (हाम्रो खेलकुद) – सहिद स्मारक ‘बी’ डिभिजन लिग फुटबल रानी पोखरी कर्नर टिम (आरसिटी) ले लिगको पहिलो खेलमै खुमलटार युथ क्लबसँग हार बेहोरेको छ ।

एन्फा कप्लेक्स सातदोबाटोमा बिहीबार भएको खेलमा आरसिटी खुमलटारसँग ३–१ को गोलअन्तरले पराजित भएको हो । खुमलटारको जितमा दिवस छन्त्याल, विपिन थापामगर र नवराज गुरुङले गोल गरे । आरसिटीका अनुप गुरुङले एक गोल फर्काए ।

खेलको १७ औं मिनेटमा दिवस छन्त्यालले गोल गर्दै खुमलटारलाई सुरुआती अग्रता दिलाए । ७९औं मिनेटमा विपिन थापा मगरले गोल गर्दै खुमलटारको अग्रता दोब्बर पारे । ८७औं मिनेटमा अनुप गुरुङले गोल गर्दै आरसिटीलाई २–१ को स्थितिमा ल्याए ।

तर, खेलको इन्जुरी समयमा नवराज गुरुङले गोल गर्दी खुमलटारलाई ३–१ को जित दिलाए । जितसँगै खुमलटारले पहिलो खेलमै महत्वपूर्ण ३ अंक जोडेको छ ।

यस्तै अर्को खेलमा श्री कुमारी क्लब र नयाँ बस्ती युथ क्लबले २–२ गोलको बराबरी खेल्दै अंक बाँडेका छन् । नयाँवस्तीका अभय धिमाल, सुमन योङयाले गोल गरे । श्री कुमारीका सृजन राज गौतम र निर बहादुर आलेले गोल गरे ।

खेलको २२ औं मिनेटमा अभय धिमालको गोलबाट नयाँ बस्तीले सुरुआती अग्रता लिएको थियो । ४८औं मिनेटमा सृजन राज गौतमले गोल गर्दै खेललाई १–१ गोलको बराबरीमा ल्याए । ६८औं मिनेटमा सुमन योङयाले गोल गर्दै नयाँ बस्तीलाई पुनः २–१ को अग्रता दिलाए । ८७औं मिनेटमा कप्तान निर बहादुर आलेले गोल गर्दै श्री कुमारीलाई हारबाट जोगाए । यस बराबरीसँगै नयाँ बस्ती र श्री कुमारीले समान १ अंक जोडेको छ ।

लिगमा १४ क्लबले सिंगल राउण्ड रोबिन लिगको आधारमा प्रतिस्पर्धा गरिरहेका छन् । शीर्ष दुई टोली ’ए’ लिगमा बढुवा हुने छन् । यस्तै पुछारका दुई टोली रेलिगेसनमा पर्ने छन् ।