काठमाडौं (हाम्रो खेलकुद) – विंगर आशिष चौधरीले एक गोलसँगै अर्का गोलको लागि असिस्ट दिएपछि चर्च ब्वाइज युनाइटेडले सहिद स्मारक ‘बी’ डिभिजन लिगमा लगातार तेस्रो जित हासिल गरेको छ ।

मध्यपुर युथ एसोसिएसनलाई २–० ले पराजित गर्दै चर्च ब्वाइजले लिगमा लगातार तेस्रो जित निकालेको हो । सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा चर्च ब्वाइजको जितमा आशिष चौधरी र कुवेर न्यौपानेले गोल गरे । दुवै गोल पहिलो हाफमा भएको थियो ।

४३औं मिनटमा आशिषको गोलबाट चर्च ब्वाइजले १–० को अग्रता बनायो । साइमन लिम्वुको चलाखीपूर्ण पासलाई आशिषले अफ साइड बिट ट्याप गर्दै एक डिफेन्डरलाई बिट गर्दै सुन्दर गोल गर्न सफल भएका थिए । पहिलो हाफको इन्ज्युरी समयको थप गरिएको पहिलो मिनेटमा कुवेर न्यौपानेले गोल गर्दै चर्च ब्वाइजको अग्रता दोब्बर पारे । विवेक पौडेलको पासमा आशिष चौधरीले लिएको पासलाई कुवेरले पोस्ट नजिकैबाट वान टचमा जाली चुमाउन सफल भएका थिए ।

दोस्रो हाफमा दुवै टोलीबाट केही अवसर सिर्जना भएपनि थप गोल निस्कन नसक्दा चर्च ब्वाइज विजयी हुन सफल भयो । यो जितसँगै शीर्षस्थानमा रहेको चर्च ब्वाइजको ३ खेलबाट ९ अंक पुगेको छ । दोस्रो हार बेहोरेको मध्यपुरको ३ खेलबाट ३ अंक नै छ ।

लिगकै अर्काे खेलमा खुमलटार युथ क्लबले बाँसबारी क्लबलाई १–० ले पराजित गरेको छ । खुमलटारको जितमा पहिलो हाफमा कप्तान सविन केसीले गरेको गोल नै निर्णायक बन्यो । उनले ३०औं मिनेटमा गोल गरेका थिए । यो जितसँगै खुमलटारको ३ खेलबाट ६ अंक पुगेको छ । पराजित बाँसबारीको ३ खेलबाट १ अंक छ ।

यस्तै लिगकै अर्काे खेलमा वीरगन्ज युनाइटेडले सामाजिक युथ क्लबलाई १–० ले पराजित गरेको छ । वीरगन्जको जितमा कृपाकान्त महतो थारुले दोस्रो हाफमा गरेको गोल नै निर्णायक बन्यो । उनले ७१औं मिनेटमा गोल गर्न सफल भएका थिए । यो जितसँगै वीरगन्को ३ खेलबाट ४ अंक पुगेको छ । पराजित सामाजिकको ३ खेलबाट १ अंक छ ।