हिमाल खरेल, झापा
पाँचौं झापा गोल्ड कपको पहिलो सेमिफाइनलको पहिलो हाफमा दुई ए डिभिजन टोली त्रिुभवन आर्मी क्लब र सातदोबाटो युथ क्लबले बराबरी खेलेका छन् । पहिलो हाफको समाप्तीमा १–१ को बराबरी भएको छ । दीपकसिंह ठकुरीको गोलमा सातदोबाटो खेलमा फर्किएको हो ।

बिर्तामोडस्थित डोमालाल राजवंशी मैदानमा सुमन आर्यालको गोलबाट आर्मीले अग्रता बनाएको थियो । इन्ज्युरी सममा गोल गर्दै सातदोबाटोले खेलमा बराबरी गरेको हो । इन्ज्युरी समयको दोस्रो मिनेटमा सातदोबाटोले बराबरी गोल फर्काएको हो ।

खेलको २७ औं मिनेटमा आर्मीले अग्रता बनाएको थियो । सन्तोष तामाङको फ्रिकिकलाई सुमनले पोष्ट नजिकबाट गोल गरेका हुन् । सुशिल राईको पेनाल्टी बक्समा निकालेको पासमा दीपकले गोल गर्दै खेललाई बराबरी पु¥याएका थिए ।

यसै महिना सम्पन्न सहिद स्मारक ए डिभिजन लिगमा आर्मी र सातदोबाटोले १–१ को बराबरी खेलेको थियो ।आर्मीले दोस्रो र पहिलो पटक ए डिजिभ लिग खेलेको सातदोबाटो चौथो स्थानमा यसपटकको लिगको अन्त्य गरेको थियो । आजको विजेताले फाइनलमा झापा ११ वा संकटा क्लबमध्ये एक टोलीको सामना गर्नेछ । झापा गोल्डकपको विजेताले १२ लाख ५५ हजार र दोस्रो हुने टोलीले ६ लाख रुपैयाँ प्राप्त गर्नेछ ।