एजेन्सी – उच्च लयमा रहेका फ्रान्सेली फरवार्ड करीम बेन्जेमाले आइतबार हुने एल क्लासिको गुमाउने भएका छन् । चोटका कारण बेन्जेमाले बार्सिलोनाविरुद्ध हुने बह्रुप्रतिक्षित खेल नखेल्ने भएका हुन् ।

रियल म्याड्रिड हाल अंक तालिकाको शीर्ष स्थानमा छ । ६६ अंक जोडेको रियलले दोस्रो स्थानको सेभिल्लालाई १० अंकले पछि पारेको छ । बार्सिलोना ५१ अंकसहित तेस्रो स्थानमा छ । तर क्याटलान टोलीले शीर्ष दुई टोलीभन्दा १ खेल कम खेलेको छ ।

खेलको पूर्वसन्ध्यामा रियलका प्रशिक्षक कार्लो एन्सेलोटिले बेन्जेमा नहुँदा पनि बार्सिलोनालाई हराउन सक्ने दावी गरे । ‘मलाई लाग्छ हामी जित्न सक्छौं,’ बेन्जेमाविना जित्न सकिन्छ भन्ने प्रश्नमा उनले भने, ‘पक्कैपनि उनी हाम्रो टोलीका महत्त्वपूर्ण खेलाडी हुन् । उनले नै खेलमा निर्णायक भूमिका खेल्दै आएका छन् । तर अब उनको काम गर्न अन्य खेलाडी अघि आउनेछन् ।’

‘बेन्जेमा ३४ वर्षका भए । र यो उमेरमा सामान्य समस्या आउँछ नै । यो सामान्य चोट हो र उनी राम्रोसँग ठिक हुँदैछन्,’ प्रशिक्षकले थपे, ‘उनी जब फर्कन्छन्, फेरी प्रभाव जमाउँछन् नै । अबको दुई सातामा उनी पूर्ण रुपमा ठिक हुनेछन् ।’

‘बेन्जेमा क्लासिको नखेल्नुले मलाई धेरै तनाव छैन । हामीलाई सिजनको अन्त्यतिर उनको आवश्यकता हुनेछ ।’

म्याड्रिडले के गुमाउनेछ ?

बेन्जेमाले सिजनभर ३४ खेल खेलेका छन् । यसक्रममा उनले ३२ गोल र १३ असिस्ट प्रदान गरेका छन् । आक्रमणमा उनको प्रभावले अन्य खेलाडीको पनि प्रदर्शनमा सुधार आएको छ । विशेषगरी भिनिसियस जुनिअर जसले १७ गोल र १४ असिस्टको योगदान दिएका छन् ।