एजेन्सी – सालेरनिटानामाथि सहज जित निकाल्दै युभेन्ट्सले इटालियन सिरी ‘ए’ मा शीर्ष चारमा बलियो पकड बनाएको छ । घरेलु मैदानमा युभेन्ट्सले सालेरनिटानालाई २–० ले हराएको हो ।

एलिएन्ज एरिना टोरिनोमा आइतबार राति भएको खेलमा घरेलु टोलीको सहज जितमा पाउलो डिबाला र डुसान भ्लाहोभिचले गोल गरे । दुवै गोल पहिलो हाफमा भएको थियो ।

खेलको पाँचौ मिनेटमा डिबालाको गोलबाट युभेन्ट्सले सुरुवाती अग्रता लिएको थियो । उनले डुसान भ्लाहोभिचको पासमा गोल गर्न सफल भएका थिए । २९औं मिनेटमा डुसान भ्लाहोभिचले गोल गर्दै युभेन्ट्सको अग्रता दोब्बर पारे ।

डुसानले माटिया डि स्किजलियोको पासमा गोल गरेका थिए । दोस्रो हाफमा थप गोल निस्कन नसक्दा युभेन्ट्स विजयी हुन सफल भयो ।यो जितसँगै युभेन्ट्सले शीर्ष टोली एसी मिलानसँगको अंक दुरी ७ मा छोट्याउँदा पाँचौ स्थानको एटलान्टालाई ९ अंकले पछि पारेको छ ।

युभेन्ट्सको ३० खेलबाट ५९ अंक पुगेको छ । शीर्षस्थानको मिलानको ६६ तथा नेपोलीको ६३ तथा इन्टर मिलानको ६० अंक छ । एटलान्टाको ५१ तथा पराजित सालेरनिटाना १६ अंक जोडेर पुछारमा रहँदा रेलिगेसन दवाव बढेको छ ।

सिरी ‘ए’ कै अर्काे खेलमा रोमाले लाजियोलाई ३–० ले पराजित गरेको छ । रोमाको जितमा ट्याम्मी अब्राहमदे दुई तथा लोरेन्जो पेलिग्रेनीले गोल गरे । यो जितसँगै रोमा ५१अंक जोड्दै छैटौं स्थानमा उक्लदा लाजियो ४९ अंकसहित सातौं स्थनमा झरेको छ ।