काठमाडौं (हाम्रो खेलकुद) – शीर्षस्थानमा रहेको चर्च ब्वाइज युनाइटेड सहिद स्मारक ‘बी’ डिभिजन लिगमा स्तब्ध बन्दा रानीपोखरी कर्नर टिम (आरसिटी) ले फराकिलो जित निकालेको छ ।

सातदोबाटोस्थित एन्फा कम्प्लेक्सको खेल मैदानमा आइतबार चर्च ब्वाइज सामाजिक युथ क्लबसँग १–० ले स्तब्ध बनेको हो । चर्च ब्वाइजलाई स्तब्ध पार्न सामाजिकका सुरेश खत्रीले दोस्रो हाफमा गरेको गोल नै निर्णायक बन्यो । उनले ७६औं मिनेटमा गोल गरेका थिए ।

हारसँगै चर्च ब्वाइज शीर्षस्थानमा यथावत रहेपनि अंक दुरी बढाउने अवसर गुमाएको छ । चर्च ब्वाइजको ९ खेलबाट १७ अंक रहेको छ । चर्च ब्वाइजलाई हराएको सामाजिकको ९ खेलबाट १० अंक पुगेको छ ।

अर्काे खेलमा आरसिटीले झम्सिखेल युथ क्लबलाई ३–० ले पराजित गरेको छ । आरसिटीको जितमा प्रज्वल गुरुङले दुई तथा विश्वास थापामगरले एक गोल गरे ।

यो जितसँगै आरसिटी ९ खेलबाट १५ अंक जोडेर दोस्रो स्थानमा उक्लिएको छ । आरसिटीले एक खेल कम खेलेको सरस्वती युथ क्लबलाई गोलअन्तरमा पछि पारेको हो । पराजित झम्सिखेल ९ खेलबाट ६ अंक जोडेर रेलिगेसन जोनमा रहेको छ ।

लिगकै अर्काे खेलमा श्री कुमारी क्लबले मध्यपुर युथ एसोसिएसनलाई २–१ ले पराजित गरेको छ । श्री कुमारीको जितमा ओम प्रकाश सिंह र राज भुसालले गोल गरे । मध्यपुरका धिरज श्रेष्ठले एक गोल फर्काए ।

यो जितसँगै श्री कुमारीको ९ खेलबाट १३ अंक पुगेको छ । पराजित मध्यपुरको ९ खेलबाट १० अंक छ ।