चितवन (हाम्रो खेलकुद) – धनगढी उपमहानगरपालिका कैलाली र विभागीय नेपाल एपिएफ क्लबले महिला राष्ट्रिय लिगमा लगातार दोस्रो जित दर्ता गरेका छन् ।

चितवनको भरतपुरमा सोमबार भएको खेलमा धनगढीले चन्द्रपुर नगरपालिका रौतहटमाथि २–१ को जित निकाल्दै लिगमा लगातार दोस्रो जित निकाल्न सफल भएको हो । धनगढीको जितमा विर्सना चौधरी र चन्द्रा भण्डारीले गोल गरिन् । चन्द्रपुरकी रजनी थोकरले एक गोल फर्काइन् ।

४४औं मिनेटमा रजनी थोकरको गोलबाट भनगढीले सुरुवाती अग्रता लिन सफल भएको थियो । तर, चन्द्रपुरको त्यो अग्रता लामो समय टिकेन । पहिलो हाफको इन्ज्युरी समयको थप गरिएको दोस्रो मिनेटमा विर्सना चौधरीले गोल गर्दै खेललाई १–१ गोलको बराबरीमा ल्याइन् ।

पहिलो हाफकै इन्ज्युरी समयको थप गरिएको चौथो मिनेटमा चन्द्रा भण्डारीले गोल गर्दै धनगढीलाई २–१ को अग्रता दिलाइन् । दोस्रो हाफमा थप गोल निस्कन नसक्दा पहिलो हाफको नतिजा नै धनगढीलाई ३ अंक जोड्न पर्याप्त बन्यो ।

यो जितसँगै धनगढी दुई खेलबाट ६ अंक जोडेर शीर्षस्थानमा रहेको छ । समान ६ अंक नै रहेपनि एपिएफ गोलअन्तरमा दोस्रो स्थानमा रहेको छ । जित निकाल्न नसकेको चन्द्रपुर अंकविहीन हुँदै सातौ स्थानमा रहेको छ ।

यस्तै लिगको अर्काे खेलमा उपाधि दावेदार एपिएफले लगातार दोस्रो जित दर्ता गर्ने क्रममा विभागीय प्रतिद्धन्द्धी नेपाल पुलिस क्लबलाई २–० ले पराजित गरेको छ । एपिएफको जितमा प्रिती राई र सावित्रा भण्डारी ‘साम्वा’ ले गोल गरिन् ।

प्रतिस्पर्धात्मक खेलको ५१औं मिनेटमा प्रितीको गोलबाट एपिएफले सुरुवाती अग्रता लिएको थियो । त्यसपछि इन्ज्युरी समयको थप गरिएको पहिलो मिनेटमा सावित्राले गोल गर्दै एपिएफको जित पक्का गरिन् ।

यो नतिजापछि एपिएफले शीर्षस्थानको धनगढीसँगको अंक दुरी बराबरी गरेको छ । समान २ खेलबाट ६ अंक रहेपनि एपिएफ गोलअन्तरमा पछि छ । पहिलो हार बेहोरेको पुलिस ३ अंक जोडेर चौथो स्थानमा रहेको छ । पुलिसँगै आर्मी, विराटनगर र ललितपुरको समान ३ अंक छ । चन्द्रपुर र वालिङले अंकको खाता खोल्न सकेका छैनन् ।