काठमाडौं (हाम्रो खेलकुद)– राष्ट्रिय महिला फुटबल टोलीकी पूर्व खेलाडी पेमा डोल्मा लामाले पुराना, नयाँ खेलाडीलाई हरेक वर्ष सम्मान गर्ने उद्देश्यका साथ अक्षयकोष स्थापना गरेकी छन् ।

अखिल नेपाल फुटबल संघ (एन्फा) मा आबद्ध भएयता विभिन्न प्रतियोगिताका दौरान भत्ता वापत रकम र त्यसमा थप गरेर हालै ३ लाख रुपैयाँको अक्षयकोषको स्थापना गरेको लामाले जनाएकी छिन् । त्यस अक्षयकोषबाट प्राप्त हुने व्याजबाट हरेक वर्ष पुराना वा नयाँ खेलाडीलाई हरेक वर्ष महिला दिवस (मार्च) को दिन सम्मान गर्ने शुक्रबार प्रेस विज्ञप्तीमार्फत जानकारी दिएकी छन् । सम्मान गर्ने खेलाडी तय गर्नका लागि अलग्गै एउटा समिति गठन गर्ने बताइएको छ ।

पुराना खेलाडीले देशको फुटबलका लागि पुर्याएको योगदानको कदर र नयाँ खेलाडीको हकमा हौसला बढाउनु नै सम्मानको उद्देश्य रहेको जनाउँदै लामाले आफ्नो प्रयासले महिला फुटबलमा थोरै भएपनि सकारात्मक प्रभाव पर्न सक्ने विश्वास लिएको बताएकी छन् ।

हाल एन्फा केन्द्रिय सदस्य रहेकी लामा महिला समितिको संयोजक र महिला फुटबल संघको महासचिव पनि हुन् । महिला फुटबलको विकासका लागि व्यक्तिगत र सामूहिक प्रयास गर्नुपर्दछ भन्नेमा विश्वास राख्ने लामा देशका लागि अन्तर्राष्ट्रिय गोल गर्ने पहिलो नेपाली खेलाडी हुन् ।

खेल जीवन पछि उनले सन् २००० देखि २०१० सम्म फिफा सहायक रेफ्री र २०११ देखि २०१६ सम्म रेफ्री इन्स्ट्रक्टरको जिम्मेवारी निर्वाह गरेकी थिइन् । एन्फाको को पछिल्लो निर्वाचनमा उनी केन्द्रिय सदस्यमा निर्वाचित भएकी थिइन् ।