एजेन्सी – युइएफए च्याम्पियन्स लिगको क्वाटरफाइनलको पहिलो लेगमा स्पेनिस क्लब भिल्लारियलले जर्मन महारथी बायर्न म्युनिखसँग प्रतिस्पर्धा गर्दैछ ।

खेल भिल्लारियलमा नेपाली समयअनुसार राति १२ः४५ बजे हुनेछ । घरेलु मैदानमा हुने खेलमा भिल्लारियल बलियो बायर्नलाई स्तब्ध पार्दै सेमिफाइनल पुग्ने सम्भावना बलियो बनाउन चहान्छ ।

स्पेनिस ला लिगाको सातौं स्थानमा रहेको भिल्लारियलसँग जियोभानी लो सेल्सो, जेरार्ड मोरेनो, एर्नाउट डानजुमा, म्यानुयल ट्रिगुइरोस, इटिने कापोई, ड्यानियल पारेजो, अलफन्सो पेडराजा, पाउ टोरेस, राहुल एल्विओल, जुआन फोयथ र गोलरक्षक जेरोनिमो रुल्ली रहेका छन् ।

यता, जर्मन बुन्डेस लिगाको शीर्षस्थानमा रहेको बायर्न पनि अवे जित निकाल्दै सेमिफाइनल पुग्ने सम्भावना बलियो बनाउन चहान्छ । टोलीको लागि पोलिस फरवार्ड रोवर्ट लेवान्डोस्की नै मुख्य हतियार हुनेछन् । उनले यो सिजन ३८ खेलमा ४५ गोल गरिसकेका छन् ।

लेवान्डोस्कीलाई थोमस मुलर, किङ्सले कोमान, लेरोए साने, लियोन गोरेट्जका, योसुवा किम्मिख, थियो हर्नान्डेज, निकोलस सुल, बेन्जामिन पाभार्ड, डेअट उपमिकानो र गोलरक्षक तथा कप्तान म्यानुयल नुएरले साथ दिनेछन् ।

यि दुई टोली तेस्रो पटक आमाने–सामाने हुन लागेको हो । पछिल्लोपटक यि दुई टोलीले २०११ को च्याम्पियन्स लिगको समूह चरणमा प्रतिस्पर्धा गरेका थिए । दुवै खेलमा बायर्न विजयी भएको थियो । बायर्न सोही जितलाई निरन्तरता दिने लक्ष्यमा रहँदा भिल्लारियल उक्त हारको बदला लिने लक्ष्यमा हुनेछ ।

दोस्रो लेग बायर्नको मैदानमा १२ अप्रिलको राति हुनेछ ।