एजेन्सी – विश्व फुटबलको सर्वाेच्च निकाय (फिफा) ले फिफा विश्वकप कतार २०२२ को छनोट अन्तर्गत प्ले अफको युक्रेन र स्कटल्याण्डबीचको सेमिफाइनल खेलको मिति तय गरेको छ ।

रूसले युक्रेनमाथि आक्रमण गरेपछि रोकिएको खेल आगामी जुन १ मा हुने तय भएको फिफाले जनाएको छ । यसअघि नियमित तालिका अनुसार मार्च २४ हुने तालिका थियो । रुसबाट युद्वको सामना गरिरहेपछि खेल स्थगित गरिएको थियो ।

फिफाले यसअघि नै समूह विभाजन गरिसकेका कारण यो खेलको विजेताले आगामी जुन ४ मा वेल्ससँग खेल्नेछ । विजेताले कतार विश्वकपको समूह ‘बी’ मा इङ्ल्याण्ड, अमेरिका र इरानसँग रहनेछ ।

यसपछि एसियाली छनोटबाट अष्ट्रेलिया र युएईले जुन ७ मा खेल्नेछन् । यसको विजेताले जुन १३ मा दक्षिण अमेरिकाको पेरुसँग प्रतिस्पर्धा गर्नेछ । विजेता समूह ‘डी’ मा फ्रान्स, डेनमार्क र ट्युनिसियासँग रहनेछ ।

यस्तै १४ जुनमा हुने कोष्टारिका र न्युजिल्याण्डको विजेता विश्वकपमा छनोट हुने अन्तिम टोली हुनेछ । यसमा जित हात पार्ने टोली स्पेन, जर्मनी र जापानसँगै यो टोली समूह ‘ई’ मा रहनेछ ।

विश्वकपका लागि हालसम्म २९ टोलीको टुंगा लागिसकेको छ । फिफा विश्वकप नोभेम्बर २१ देखि डिसेम्बर १८ कतारको दोहामा हुँदैछ । यसअघिका विश्वकप समर सिजन अर्थात जुन जुलाईमा हुदै आएपनि पहिलोपटक विन्टर सिजनमा हुन लागेको हो ।

छनोट भएका राष्ट्रहरु
युरोप – जर्मनी, डेनमार्क, फ्रान्स, बेल्जियम, क्रोएसिया, स्पेन, सर्बिया, इंग्ल्यान्ड, स्वीट्जरल्यान्ड, नेदरल्यान्ड्स, पोर्चुगल र पोल्यान्ड
दक्षिण अमेरिका – ब्राजिल, अर्जेन्टिना, उरुग्वे र इक्वेडर
उत्तर तथा मध्य अमेरिका (कोन्काफ) – क्यानडा, अमेरिका र मेक्सिको
एसिया – कतार (आयोजक) इरान, दक्षिण कोरिया, साउदी अरेबिया र जापान
दक्षिण अफ्रिका – घाना, सेनेगल, ट्युनिसया, मोरोक्को र क्यामरुनले

छनोट हुन बाँकी
(वेल्सविरुद्ध स्कटल्यान्ड युक्रेन) (जुनमा प्ले अफ)
अष्ट्रेलिया र युएई विरुद्ध पेरु (जुनमा अन्तर्राष्ट्रिय प्ले अफ)
कोस्टा रिकाविरुद्ध न्युजिल्यान्ड (जुनमा अन्तर्राष्ट्रिय प्ले अफ)