काठमाडौं (हाम्रो खेलकुद) – एएफसी एसियन कप २०२३ को छनोटको तयारीमा रहेको नेपालले अफगानिस्तानसँग दुई मैत्रीपूर्ण खेल खेल्ने पक्का भएको छ ।

अखिल नेपाल फुटबल संघ (एन्फा) का अनुसार नेपालले अफगानिस्तानसँग दुई मैत्रीपूर्ण खेल खेल्ने पक्का भएको जनाएको छ । मैत्रीपूण खेल कतारको दोहामा मे २५ र २९ मा हुनेछ ।

एएफसी एसियन कप २०२३ को छनोटको लागि नेपालले शुक्रबारदेखि तयारी थालेको छ । टोलीमा २५ सदस्यी रहँदा दुई खेलाडी मात्रै प्रशिक्षणमा अनुपस्थित रहेका छन् । उनीहरु केही दिनमा नै प्रशिक्षणमा जोडिने एन्फाले जनाएको छ ।

एएफसी एसियन कप २०२३ को छनोटमा नेपाल जोर्डन, कुवेत र इन्डोनेसिया रहेको समूहमा परेको छ । नेपालले ८ जुनमा जोर्डन, ११ जुनमा कुवेत र १४ जुनमा इन्डोनेसियासँग खेल्ने तालिका रहेको छ । छनोटका सबै खेल कुवेत सिटीमा हुनेछ ।

नेपाली टोलीका कुवेती प्रशिक्षक अब्दुल्लाह अलमुताइरीले नेपाल एसियन कपमा छनोट हुन नसक्ने अभिव्यक्ति दिइसकेका छन् । हामी निकै बलियो समूहमा छौं । हामी एसिया कपका लागि छनोट हुन सक्दैनौं । त्यसमा खेलाडीलाई दोष दिनु ठीक हुने छैन ।’

राष्ट्रिय टोलीको प्रशिक्षकको रुपमा नियुक्त भएर आएपछि नेपाललाई साफ च्याम्पियनसिपको फाइनल पुर्याउँछु भन्ने वाचामा आफू सफल भएको उल्लेख गर्दै उनले थपे, एसिया कपमा भने हामी छनोट हुन सक्दैनौं । धेरै अपेक्षा राख्नु उपयुक्त हुँदैन ।’ त्यसका वावजुद टोलीले कडा चुनौतीका लागि प्रयास गर्ने बताएका छन् ।

राष्ट्रिय फुटबल टोलीका खेलाडीहरुले छनोट हुन कठिन भएपनि आफ्नो तर्फबाट उत्कृष्ट प्रदर्शनको प्रयास गर्ने बताएका छन् ।

२५ सदस्यीय नेपाली फुटबल टोली

किरण कुमार लिम्बु (गोलरक्षक), दीप कार्की (गोलरक्षक), विशाल श्रेष्ठ (गोलरक्षक), अनन्त तामाङ, अन्जन विष्ट, एरिक विष्ट, आयुष घलान, विकास खवास, विमल घर्तीमगर, दर्शन गुरुङ, देवेन्द्र तामाङ, दिनेश राजवंशी, गौतम श्रेष्ठ, मनिष डाँगी, नवयुग श्रेष्ठ, पुजन उपरकोटी, रोहित चन्द, सन्तोष तामाङ, सुजल श्रेष्ठ, सुमन अर्याल, सुमन लामा, सुनिल बल, सुरज ज्यू ठकुरी,तेज तामाङ र विशाल राई