धनगढी (हाम्रो खेलकुद)– आयोजक वनदेवी युवा क्लब कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको सेमिफाइनलमा पुगेको छ ।

प्रतियोगिताको चौथो दिन मंगलबार धनगढी रंगशालामा कालिका स्पोर्टस एकेडेमीलाई २–० ले हराउँदै आयोजक टोली अन्तिम चारमा पुग्न सफल भएको हो । वनदेवीका लागि दवै गोल चन्द्रा भण्डारीले गरिन् । चन्द्राले छैटौं मिनेटमा पहिलो गोल गरेकी थिइन् । उनले अर्को गोल सकिन एक मिनेट बाँकी रहँदा गरेकी थिइन् । वनदेवीले फाइनल पुगेका लागि विभागीय टोली नेपाल पुलिस क्लबको सामना गर्नुपर्नेछ ।

प्लेयर अफ द म्याच बनेकी चन्द्राले ५ हजार सहित ट्रफी प्राप्तगरिन् । प्रतियोगिता बुधबार पहिलो सेमिफाइनल दुई विभागिय टोली एपिएफ र त्रिभुवन आर्मी फुटबल क्लबबीच हुनेछ । अर्को सेमिफाइनल बिहीबार हुनेछ । वैशाख १० गतेसम्म सञ्चालन हुने गोल्डकपमा ३ विभागीय सहित ८ टिमको सहमागी छन् । विजेता टोलीले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।

प्रतियोगिताको सर्वोत्कृष्ट खेलाडीले ५० हजार तथा विधागत उत्कृष्ट खेलाडीले समान १० हजार रुपैयाँ प्राप्त गर्नेछन् । सुदूरपश्चिमाञ्चल प्रदेश खेलकुद परिषद् प्रतियोगिताको प्रबद्र्धक रहेको छ । धनगढीमा दिउँसो चर्को गर्मी हुने भएकोले पहिलो पटक फुटबल साँझमा खेलाइएको बताइएको छ ।