काठमाडौं (हाम्रो खेलकुद)– राष्ट्रिय फुटबल टोलीका १० खेलाडी र मुख्य प्रशिक्षक अब्दुल्लाह अलमुताइरीबीचको विवादका विषयमा छानविन गर्न राष्ट्रिय तथा अन्तर्राष्ट्रिय खेलाडी संघ (एनएनआइपिए) ले अखिल नेपाल फुटबल संघ (एन्फा) सँग माग गरेको छ ।

एन्फा खेलाडी संघले घटनाको छानविन गरि दोषीलाई कारवाही गर्न माग राखेपको प्रसंग उल्लेख गर्दै एनएनआइपिएले एन्फालाई छानविनका आग्रह गरेको छ । एन्फाले बुधबार एक सदस्यीय छानविन समिति गठन गरेको विभिन्न सञ्चारमाध्यमबाट जानकारी भएको पनि उल्लेख गरेको छ ।

एक सदस्यीय छानविन समितिबाट उचित न्यायिक छानविन हुने विषयमा एन्फा को कार्य समिति के अन्य पदाधिकारी लगायत पीडित खेलाडीहरुलाई विश्वसनीय नभएको मनि टिक्का–टिप्पणी समेत भइरहेको विषयमा एनएनआइपिएको ध्यानार्कषण रहेको छ,’ एन्फा अध्यक्ष कर्मा छिरिङ शेर्पालाई एनएनआइपिएले शुक्रबार बुझाएको पत्रमा भनिएको छ ।

पत्रमा अगाडि भनिएको छ, ‘पीडित खेलाडीहरुलाई अमान्य रहेको गठित एक सदस्यीय छानविन समिति एनएनआइपिएलाई पनि नीति सम्मत एवं व्यवहारिक नभएको बुझाई रहेको छ यसर्थ देशको गौरवसग जोडिएको गम्भिर विषयमा न्यायिक तथा प्रभावकारी छानविन गर्नको निमित्त न्युनत्तम वा सो भन्दा बढी सदस्य रहने गरी सबै पक्षले विश्वास गर्न लायक नयाँ छानविन समिति गठन गरी यथासिघ्र समाधानको लागि एनएनआइपिए माग गर्दछ ।’

एएफसी एसियन कप छनोट २०२३ को छनोट चरणको तयारीमा रहेको राष्ट्रिय फुटबल टोलीका १० सिनियर खेलाडीले प्रशिक्षक अलमुताईरीको व्यवहारका कारण वैशाख १३ गते क्याम्प छाड्न परेको थियो । एन्फा होस्टलमा न्यूनत्तम सुविधा नभएकाले टोलीमा होटलमा राख्नुपर्ने भन्ने खेलाडीको माग राखेका रोहित चन्दलाई अलमुताइरीले टोलीबाट हटाएपछि विवाद सुरुवात भएको थियो । कप्तान तथा गोलरक्षक किरण चेम्जोङको अनुपस्थितिमा टोलीको नेतृत्व सम्हालिरहेका रोहित खेलाडीहरुको आपसी सल्लाहमा नै होटलमा राख्नुपर्ने भनाई राखेका थिए ।

रोहितले आफूहरुकै सामूहिक माग राखेको त्यसमा छलफल गर्न खेलाडीहरुले गरेको आग्रहलाई अस्वीकार गर्दै अलमुताइरीले अन्य खेलाडीले पनि क्याम्प छाडे हुन बताएका थिए । त्यसपछि आफू क्याम्पबाट निस्केको खेलाडीहरुले पत्रकार सम्मेलनमार्फत वैशाख १५ गते जानकारी दिएका थिए ।

रोहितसँगै सिनियर खेलाडीहरु सुजल श्रेष्ठ, अनन्त तामाङ, विशाल राई, विमल घर्तीमगर, दीनेश राजवंशी, विशाल श्रेष्ठ, अन्जन विष्ट, तेज तामाङ, सुमन लामाले क्याम्प छाडेका थिए । अलमुताइरीले बिहीबार मात्र १७ नयाँ खेलाडीलाई टोलीमा समेटका छन् । त्यसरी समेटिएका मध्ये विकेश कुथुले भने आफू तत्काल टोलीमा आबद्ध हुन नसक्ने जनाएका छन् ।

क्याम्पबाट निकालिएका १० खेलाडीहरुले एन्फासँग घटनाको छानबिन गर्न र आफूहरु दोषी पाइए कारवाही गर्न समेत आग्रह गरेका थिए । घटनाका बारेमा एन्फाले अहिले सम्म आधिकारिक धारणा सार्वजनिक गरेको छ । यहि विषयमा छलफल गर्न एन्फा वरिष्ठ उपाध्यक्ष पंकज विक्रम नेम्बाङसहित ४ जनाले एन्फा बैठक राख्न अध्यक्ष कर्मा छिरिङ शेर्पासँग लिखित रुपमा माग गरेका थिए । वैशाख २५ गते एन्फा कार्यसमितिको बैठक बस्ने बताइएको छ ।