जापानको सानदार जित

एजेन्सी – एसियाली राष्ट्र जापानले अन्तर्राष्ट्रिय मैत्रीपुर्ण खेलमा सानदार जित निकालेको छ । घरेलु मैदानमा जापानले अफ्रिकी प्रतिद्धन्द्धी घानामाथि ४–१ को सानदार जित दर्ता गरेको हो ।

नोइभिर स्टेडियम कोवेमा शुक्रबार साँझ भएको खेलमा घरेलु टोलीको सहज जितमा मिकी यामाने, काओरु मितोमा, ताकेफुसा कुवो र दाइजेन माइदाले गोल गरे । घानाका जोर्डन एयुले एक गोल फर्काए ।

खेलको २९औं मिनेटमा मिकी यामानेको गोलबाट जापानले सुरुवाती अग्रता लिएको थियो । ४४औं मिनेटमा जोर्डन एयुले बराबरी गोल फर्काए । पहिलो हाफको इन्ज्युरी समयको थप गरिएको पहिलो मिनेटमा काओरु मितोमाले गोल गर्दै जापानलाई पहिलो हाफमा २–१ को अग्रता दिलाए ।

७३औं मिनेटमा ताकेफुसा कुवोले गोल गर्दै खेललाई ३–१ ले अघि बढाए । ८२औं मिनेटमा दाइजेन माइदाले गोल गर्दै जापानको फराकिलो जित पक्का गरे ।

अर्काे मैत्रीपूर्ण खेलमा ट्युनिसियाले चिलीलाई २–० ले पराजित गरेको छ । ट्युनिसियाको जितमा अली एब्दी र इसाम जेवालीले गोल गरे । चिलीका डिएगो भ्यालेन्सियाले अन्तिम समयमा पेनाल्टी चुकाएका थिए ।