एजेन्सी – एमएलएसमा फुटबलको अर्को ठूलो नाम जोडिएको छ । इग्ल्यान्ड फुटबल टोलीका पूर्व कप्तान समेत रहेका वाइने रुनी औपचारिक रुपमै डिसी युनाइटेडम आबद्ध भएका छन् । यद्दपी उनी खेलाडीका रुपमा नभई टोलीको नयाँ प्रशिक्षकका रुपमा आबद्ध भएका हुन् ।

युनाइटेडले मंगलबार औपचारिक रुपमा रुनीलाई आफ्नो प्रशिक्षकका रुपमा सार्वजनिक गरेको हो । उनी डिसी युनाइटेडमा आबद्ध हुने यसअघि नै चर्चा चलिरहेको थियो । सम्झौताका केहि बुदामा प्रष्ट हुनका लागि केहि समय लागेको बताइएको थियो । टोली अहिले कठिन अवस्थामा रहेकोले त्यसमा सुधार गर्न प्रयास गर्ने रुनीले बताएका छन् ।

रुनीका चुनौती
‘पक्कै चुनौती छ । तर त्यसको सामना गर्नका लागि म यहाँ आएको छु । टोलीलाई पुनः सफलता दिलाउनका लागि प्रयास गर्नेछु,’ पत्रकार सम्मेलनमा रुनीले भने । गत साता मात्र युनाइटेड फिलाडेफिल युनियनसँग ७–० ले पराजित भएको थियो । हारपछि टोलीले इस्टन कन्फ्रेन्सको अंकतालिकाको पुछारमा रहेको छ । टोलीले यो सिजन १० खेलमा हार बेहोरिसकेको छ ।

प्ले अफको सम्भावना

खराब प्रदर्शनका बाबजुद टोलीले आउने खेलमा सफलता प्राप्त गरेको खण्डमा प्ले अफमा पुग्ने सम्भावना भने यथावत छ । प्ले अफका लागि टोलीलाई ९ अंकको आवश्यकता रहेको छ । केहि खेलमा जित हासिल गरेको खण्डमा पनि टोली प्ले अफको यात्रामा अघि बढ्न सक्छ । रुनीको काँधमा टोलीलाई अघि बढाउने जिम्मेवार परेको छ । उनले टोलीका खेलाडीलाई समेत भेटिसकेका छन् । बुधबार युनाइटेडले कोलम्बस क्र्यूसँग प्रतिस्पर्धा गर्दैछ ।

रुनी फुटबलका महान खेलाडी मध्येका एक हुन् । प्रशिक्षणमा पनि उनले राम्रो गर्न सक्नेछन् । युवा प्रशिक्षकका रुपमा उनले आफूलाई अघि बढाइसकेका छन् । टोलीलाई कसरी नेतृत्व गर्ने भन्ने उनलाई राम्रो जानकारी छ, पत्रकार सम्मेलनमा डिसी युनाइटेडका सह मालिक स्टिभ काप्लानले बताएका छन् ।