काठमाडौं (हाम्रो खेलकुद)– अखिल नेपाल फुटबल संघ (एन्फा) को नवनिर्वाचित कार्यसमितिको दोस्रो बैठक सुरु भएको छ । सातदोबाटोस्थित एन्फा मुख्यालयमा बिहान ७ः०० बजे बैठक सुरु हुने भनिएपनि झण्डै २ घण्टा पछि मात्र बैठक सुरु भएको हो ।

साउन २ गतेका लागि तय बैठक एन्फा अध्यक्ष पंकजविक्रम नेम्बाङ अस्वस्थ्य भएपछि स्थागित गरिएको थियो । कार्यसमिति बैठकका लागि विविधसहित १८ वटा एण्जेडामा छलफल हुँदैछन् । त्यसमा सबैभन्दा चासोको साथ एन्फा सहायक महासचिव र प्रवक्ताको नियुक्तीलाई लिएर हेरिएको छ ।

विधानको व्यवस्था अनुसार केन्द्रिय समितिले ३ सहायक महासचिव, प्रमुख कार्यकारी अधिकृत (सिइओ), प्रवक्ता नियुक्त गर्न पाउने प्रावधान छ । ३ सहायक महासचिवका लागि ५ जना आकांक्षी देखिएपछि त्यसको निर्णय दोस्रो बैठकमा नहुने सम्भावना पनि बढेर गएको छ ।

सहायक महासचिवकै विषयमा छलफल गर्न साउन १ गते निर्वतमान अध्यक्ष कर्मा छिरिङ शेर्पा पक्षबाट निर्वाचित बाहेक १२ जनाको अनौपचारिक बैठक बसेको खुलेको छ । गौरव थापालाई सिइओमा प्रस्ताव गर्नका लागि नियमावली बाधक देखिएपछि विकल्पमा उनलाई सहायक महासचिव बनाउनका लागि एन्फा अध्यक्ष नेम्बाङमाथि दबाब बढेको छ ।

।
फिफाबाट १० वर्षको प्रतिबन्धमा रहेका गणेश थापाको समर्थकका रुपमा परिचित एन्फामा निर्विचित पदाधिकारी र सदस्यले थापाका छोरा गौरवलाई जसरी पनि सहायक महासचिवमा नियुक्त गराउन दबाब सृजना गरेको एन्फा पदाधिकारी नै स्वीकार गर्छन् ।
एन्फाले विविधसहित १२ वटा एजेण्डा तय गरेको थियो । त्यसमा उपाध्यक्ष केसी ५ र दीपक खतिवडाले एउटा एजेण्डा थप गर्न माग गरेपछि १८ एजेण्डा प्रस्तुत हुँदैछन् । २१ सदस्यीय एन्फा कार्यसमितिले पूर्णता पाइसकेको छैन । असार ६ गते भएको निर्वाचनबाट ६ पदाधिकारीसहित १९ जना निर्वाचित गरेको थियो । १३ खुला सदस्यका लागि भएको निर्वाचनमा ११ जनाले निर्वाचत भएका थिए । त्यसमध्ये २ जनाका लागि ४ जनाको मत बराबरी भएपछि विशेष साधारण सभाबाट निर्वाचित गर्ने गरि स्थगित गरिएको थियो ।