काठमाडौं (हाम्रो खेलकुद) – साफ यू २० च्याम्पियनसिपको पहिलो खेलमा दीपेश गुरुङको गोलमा नेपालले माल्दिभ्सविरुद्ध अग्रता लिएको छ ।

भारतको भुवनेश्वरमा जारी खेलमा पहिलो हाफको अन्त्यतिर गोल गर्दै अभिषेकले गोल गरेका हुन् । ४२ औं मिनेटमा रिबाउन्डमा प्राप्त बलमा दीपेशले गोल गरेका थिए । कप्तान आयुष घलानको फ्रिकिक प्रहारमा आएको बललाई माल्दिभ्सका गोलकिपरले पन्च गरेपछि रिबाउन्डमा आएको बलमा झण्डै २५ यार्डबाट दीपेशले गोल गरेका थिए ।

लगत्तै नेपालले गोलअन्तर दोब्बर गर्ने मौका पाएको थियो । तर, माल्दिभ्सका रक्षकहरुले सफल हुन दिएनन् । त्यसअघि ३१ औं मिनेटमा सुगम सुवालले गोलका लागि गरेको प्रयास सफल हुन सकेन । उनको प्रहार पोष्ट नजिकबाट बाहिरिएको थियो ।
सिनियर राष्ट्रिय टोलीको समेत अनुभव बटुलिसकेका आयुषको कप्तानीमा नेपाली टोलीले यू २० मा चुनौती प्रस्तुत गरेको छ ।
यसअघि यू–१८ र यू–१९ को नाममा हुँदै आएको च्याम्पियसिप यसपालीदेखि यू–२० को नामबाट हुँदैछ । यसअघि नेपालले सुरुवाती दुई संंस्करण जित्दा पछिल्लो संस्करण भारतले जितेको थियो ।

साउन ११ गते श्रीलंकासँग प्रतिस्पर्धा गर्ने नेपालले साउन १५ गते आयोजक भारतको सामना गर्र्नेछ । राउन्ड रोविनको अन्तिम खेल नेपालले साउन १७ गते बंगलादेशसँग खेल्नेछ । सहभागी ५ टोलीको राउन्ड रोविन पछि शीर्ष २ टोलीले फाइनल खेल्नेछन् ।